ابن سعید اپنے چچا کے حوالے سے بیان کرتے ہیں کہ جنگ جمل کے دن سیدنا علی رضی اللہ عنہ نے لوگوں کو آواز دے کر ہدایت کی: کسی کو تیر نہ مارو، کسی کو نیزہ سے زخمی نہ کرو، کسی کو تلوار کا زخم نہ لگاؤ، نہ کسی کو گرفتار کرو، کیونکہ یہ وہ مقام ہے جو یہاں کامیاب ہو گیا وہ آخرت میں بھی کامیاب ہو جائے گا۔ ہم اس بات پر متفق ہو گئے پھر لوگوں نے بیک زبان ہو کر کہا: ہمیں سیدنا عثمان رضی اللہ عنہ کے خون کا بدلہ چاہئے، راوی کہتے ہیں: ابن الحنفیہ بلند ٹیلے پر ہمارے ساتھ تھے ان کے پاس علم تھا۔ راوی کہتے ہیں: سیدنا علی رضی اللہ عنہ نے ان کو نداء دی تو وہ ہماری جانب اس طرح متوجہ ہوئے کہ انہوں نے اپنا چہرہ پھیر رکھا تھا۔ پھر انہوں نے کہا: اے امیرالمومنین! لوگ سیدنا عثمان رضی اللہ عنہ کے خون کا بدلہ مانگ رہے ہیں۔ سیدنا علی رضی اللہ عنہ نے اپنے ہاتھ بلند کر کے یوں دعا مانگی ” اے اللہ! آج سیدنا عثمان رضی اللہ عنہ کے قاتلوں کو منہ کے بل گرا دے۔ پھر سیدنا زبیر رضی اللہ عنہ نے اپنے شہسوار ساتھیوں سے کہا: سب لوگ یکبارگی تیر اندازی کرو، گویا کہ وہ جنگ چھیڑنا چاہتے تھے، جب ان کے ساتھیوں نے جنگ کے آغاز کو دیکھا تو انتظار کئے بغیر حملہ کر دیا، اللہ تعالیٰ نے ان کو شکست سے دوچار کیا، مروان بن حکم نے سیدنا طلحہ بن عبیداللہ رضی اللہ عنہ کو تیر مارا جو کہ ان کی پنڈلی سے گزر کر ان کے گھوڑے کے پہلو میں پیوست ہو گیا، انہوں نے گھوڑے کو ذبح کر دیا۔ پھر مروان، سیدنا ابان بن عثمان کی جانب متوجہ ہوا، وہ اس وقت مروان کے ساتھ تھے، اور بولا: میں نے تیرے باپ کے تمام قاتلوں کے بدلے میں ایک ایسے شخص کو قتل کر دیا ہے جو ان تمام قاتلوں کے بدلے میں کافی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5692]

رفاعہ بن ایاس ضبی اپنے والد سے، وہ ان کے دادا سے روایت کرتے ہیں کہ ہم جنگ جمل کے دن سیدنا علی رضی اللہ عنہ کے ہمراہ تھے۔ سیدنا علی رضی اللہ عنہ نے سیدنا طلحہ بن عبیداللہ رضی اللہ عنہ کو پیغام بھیجا کہ وہ مجھ سے ملیں۔ سیدنا طلحہ رضی اللہ عنہ ان کے پاس آئے۔ سیدنا علی رضی اللہ عنہ نے فرمایا: میں تمہیں اللہ کی قسم دے کر پوچھتا ہوں کیا تم نے رسول اللہ صلی اللہ علیہ وسلم کی زبان مبارک سے یہ الفاظ سنے ہیں؟” جس کا میں مولیٰ ہوں، علی اس کا مولیٰ ہے، اے اللہ تو اس کی مدد کر جو علی کی مدد کرے اور تو اس کے ساتھ دشمنی کر جو علی کے ساتھ دشمنی کرے “ سیدنا طلحہ رضی اللہ عنہ نے کہا: جی ہاں۔ سیدنا علی رضی اللہ عنہ نے فرمایا: تو پھر آپ میرے ساتھ کیوں جنگ کر رہے ہیں؟ سیدنا طلحہ رضی اللہ عنہ نے کہا: مجھے یاد نہیں رہا تھا۔ پھر سیدنا طلحہ رضی اللہ عنہ واپس چلے گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5693]