سیدنا علقمہ بن وقاص رضی اللہ عنہ فرماتے ہیں: جب سیدنا طلحہ رضی اللہ عنہ، سیدنا زبیر رضی اللہ عنہ اور سیدہ عائشہ رضی اللہ عنہا، سیدنا عثمان رضی اللہ عنہ کے قصاص کا مطالبہ لے کر نکلے، انہوں نے ذات عرق مقام پر پہنچ کر اپنے ساتھیوں کا جائزہ لیا تو ان میں عروہ بن زبیر اور ابوبکر بن عبدالرحمن بن ہشام کو کمسن قرار دے کر واپس بھیج دیا، راوی کہتے ہیں کہ میں نے ان کو دیکھا ہے وہ خلوت نشینی کو پسند کرتے ہیں۔ ان کی داڑھی سینے تک آتی تھی، میں نے ان سے کہا: اے ابومحمد! میں تمہیں دیکھتا ہوں کہ (تم خلوت نشینی کو پسند کرتے ہو اور تمہاری داڑھی سینے تک آتی ہے) تم آج کے دن کے ان حالات کو ناپسند کرتے ہو، آپ اس معاملے کو چھوڑ دیں اس پر تمہیں کوئی ملامت نہیں کرے گا۔ انہوں نے کہا: اے علقمہ بن وقاص تم مجھے ملامت نہ کرو، ہم اغیار کے لئے ایک ہاتھ کی طرح ہوتے تھے۔ لیکن آج یہ لوگ دو پہاڑوں کی مانند ہو چکے ہیں جو کبھی ایک دوسرے کے ساتھ مل نہیں سکتے۔ لیکن سیدنا عثمان رضی اللہ عنہ کے خون کے بارے میں، میں چاہتا ہوں کہ میرا خون سیدنا عثمان رضی اللہ عنہ کے قصاص کی طلب میں بہہ جائے۔ میں نے محمد بن طلحہ سے کہا: تم اس جنگ میں حصہ مت لو، تمہارے چھوٹے چھوٹے بچے ہیں، تم یہ معاملہ چھوڑ دو تاکہ تمہارے ترکہ میں یہ بات باقی نہ رہے۔ انہوں نے کہا: وہ میں جانتا ہوں لیکن میں اس بات کو زیادہ ناپسند کرتا ہوں کہ میں کسی ایک کام کی نیت کروں اور پھر اس کو رد کر دوں۔ پھر میں نے محمد بن طلحہ سے لوٹ جانے کے بارے میں بات چیت کی، انہوں نے کہا: مجھے والد گرامی سے جانے کی اجازت مانگنا اچھا نہیں لگ رہا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5694]

سلیمان بن ایوب بن سلیمان بن عیسیٰ بن محمد بن طلحہ اپنے والد سے، وہ ان کے دادا سے روایت کرتے ہیں کہ سیدنا طلحہ رضی اللہ عنہ چار رشتوں میں نبی اکرم صلی اللہ علیہ وسلم کے ہم زلف تھے۔ (1) ام المومنین سیدہ عائشہ بنت ابوبکر رضی اللہ عنہا نبی اکرم صلی اللہ علیہ وسلم کے نکاح میں تھی اور ان کی بہن سیدہ ام کلثوم بنت ابوبکر رضی اللہ عنہا سیدنا طلحہ کے نکاح میں تھیں۔ ان سے تین بچے زکریا، یوسف اور عائشہ پیدا ہوئے۔ (2) ام المومنین سیدہ زینب بنت جحش رضی اللہ عنہا نبی اکرم صلی اللہ علیہ وسلم کے نکاح میں تھیں اور ان کی بہن سیدنا حمنہ بنت جحش سیدنا طلحہ بن عبیداللہ کے نکاح میں تھیں۔ ان سے ان کا ایک بیٹا ” محمد “ پیدا ہوا جو کہ اپنے والد طلحہ کے ہمراہ جنگ جمل میں شہید ہوا۔ (3) ام المومنین سیدہ ام حبیبہ بنت ابوسفیان نبی اکرم صلی اللہ علیہ وسلم کے نکاح میں تھیں اور ان کی بہن رفاعہ بنت ابوسفیان سیدنا طلحہ بن عبیداللہ کے نکاح میں تھیں۔ (4) ام المومنین سیدہ ام سلمہ بنت ابوامیہ رسول اللہ صلی اللہ علیہ وسلم کے نکاح میں تھیں اور ان کی بہن قریبہ بنت ابوامیہ سیدنا طلحہ بن عبیداللہ کے نکاح میں تھیں۔ ان سے مریم بنت طلحہ پیدا ہوئیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5695]

سیدنا طلحہ بن مصرف فرماتے ہیں: سیدنا علی رضی اللہ عنہ نے جنگ جمل کے دن سیدنا طلحہ رضی اللہ عنہ کو بٹھایا، ان کے سر سے مٹی وغیرہ صاف کی پھر سیدنا حسن بن علی رضی اللہ عنہما کی جانب متوجہ ہو کر فرمایا: کاش کہ میں آج سے تیس سال پہلے فوت ہو گیا ہوتا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5696]

سیدنا ابوبکرہ فرماتے ہیں: جنگ جمل کے تڑپتی ہوئی لاشوں اور پھڑکتے ہوئے سروں کو دیکھ کر سیدنا علی رضی اللہ عنہ نے فرمایا: اے حسن! اس واقعہ کے بعد اب کس بھلائی کی امید کی جا سکتی ہے؟ سیدنا حسن رضی اللہ عنہ نے کہا: میں نے تو آپ کو یہاں آنے سے پہلے ہی یہاں نہ آنے کی عرض کی تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5697]

سفیان بن عیینہ فرماتے ہیں: میں نے عمرو بن دینار سے پوچھا: اے ابومحمد! سیدنا طلحہ رضی اللہ عنہ نے اور سیدنا زبیر رضی اللہ عنہ نے سیدنا علی رضی اللہ عنہ کی بیعت کر لی ہے؟عمرو نے کہا: مجھے حسن بن محمد نے بتایا ہے (اور میں نے ان سے زیادہ صاحب علم کبھی کوئی شخص نہیں دیکھا) کہ سیدنا علی رضی اللہ عنہ ایک بلند جگہ پر بیٹھے ہوئے تھے وہ دونوں (طلحہ اور زبیر رضی اللہ عنہما) سیدنا علی رضی اللہ عنہ کی جانب بلند ہوئے، ان کی بیعت کی اور نیچے اتر آئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5698]