سہل بن ابی حثمہ فرماتے ہیں: میں سیدنا محمد بن مسلمہ انصاری رضی اللہ عنہ کے پاس بیٹھا ہوا تھا، سیدنا ضحاک بن خلیفہ کی صاحبزادی وہاں سے گزری، تو وہ بڑی دلچسپی کے ساتھ ان کو دیکھنے لگے، میں نے ان سے کہا: سبحان اللہ! آپ صحابی رسول ہو کر ایسی حرکت کر رہے ہو؟ انہوں نے کہا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ جب اللہ تعالیٰ کسی خاتون سے شادی کی بات کسی کے دل میں ڈال دے تو اس کی طرف دیکھنے میں حرج نہیں ہے۔ ٭٭ یہ حدیث غریب ہے اور ابراہیم بن صرمہ ہماری اس کتاب کے معیار کے راوی نہیں ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5951]

سیدنا جابر بن عبداللہ رضی اللہ عنہ فرماتے ہیں: محمد بن مسلمہ رضی اللہ عنہ، ابوعبس بن جبر رضی اللہ عنہ اور عباد بن بشر رضی اللہ عنہ نے کعب بن اشرف کو قتل کیا تھا، جب نبی اکرم صلی اللہ علیہ وسلم نے ان کی جانب دیکھا تو فرمایا: یہ چہرے کامیاب ہو گئے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا، البتہ شیخین رحمۃ اللہ علیہما نے عمرو بن دینار کی وہ حدیث نقل کی ہے جس میں سیدنا جابر بن عبداللہ رضی اللہ عنہ نے رسول اللہ صلی اللہ علیہ وسلم کا یہ فرمان نقل کیا ہے ” کعب بن اشرف کو کون واصل جہنم کرے گا؟ اس نے اللہ اور اس کے رسول کو اذیت دی ہے۔ لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس مکمل سیاق کے ساتھ حدیث نقل نہیں کی جیسے درج ذیل ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5952]