ابوحاجب بیان کرتے ہیں کہ میں حکم بن عمرو غفاری کے پاس موجود تھا، اس کے پاس سیدنا علی ابن ابی طالب رضی اللہ عنہ کا سفیر آیا، اس نے کہا: امیرالمومنین سیدنا علی ابن ابی طالب رضی اللہ عنہ آپ کے لئے فرماتے ہیں: جن لوگوں نے اس (بیعت والے معاملے میں) ہماری معاونت کی ہے ان میں سے آپ سب سے زیادہ مستحق ہیں۔ انہوں نے کہا: میں نے تمہارے چچا زاد بھائی، اپنے خلیل رسول اللہ صلی اللہ علیہ وسلم کو یہ فرماتے ہوئے سنا ہے ” جب معاملہ اس نوعیت کا ہو تو تم لکڑی (میسر آئے تو اس) کی تلوار بنا لینا “۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5980]

احمد بن شیبان کہتے ہیں: حکم بن عمرو، رافع بن عمرو اور علیہ بن عمرو رضوان اللہ علیہم اجمعین کو رسول اللہ صلی اللہ علیہ وسلم کی صحبت کی سعادت حاصل ہے، پھر زیاد نے حکم کو خراسان کا والی بنا دیا، ان کی وفات کا سبب یہ تھا کہ مقام ” مرو “ میں زیادہ کی جانب سے ان کو ایک خط موصول ہوا تھا اور ایک خط سیدنا معاویہ کی جانب سے ان کو موصول ہوا، ان کو پڑھ کر انہوں نے اپنی وفات کی خود دعا مانگی تھی، ان کی دعا قبول ہو گئی، اور مقام ” مرو “ میں ہی ان کا انتقال ہو گیا۔ ان سے پہلے اسی دن سیدنا بریدہ اسلمی رضی اللہ عنہ کا انتقال ہوا تھا۔ ان دونوں کو حمزہ سکری کے حمام کے بالمقابل حصین قبرستان میں دفن کیا گیا۔ (احمد بن شیبان) کہتے ہیں: میں نے ان دونوں کی قبر کی زیارت کی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5981]

حسن روایت کرتے ہیں کہ زیاد نے سیدنا حکم بن عمرو غفاری کو خراسان کا والی مقرر کیا۔ ان لوگوں کے ہاتھ بہت سارا مال غنیمت لگا۔ سیدنا معاویہ نے ان کی جانب پیغام بھجوایا کہ پورا مال امیرالمومنین کے لئے رکھ لیا جائے اور اس میں سے سونا، چاندی اور کچھ بھی مسلمانوں میں تقسیم نہ کیا جائے۔ اس خط کے جواب میں سیدنا حکم رضی اللہ عنہ نے سیدنا معاویہ رضی اللہ عنہ کو لکھا ” امابعد تم نے خط لکھا ہے اور اس میں امیرالمومنین کے خط کا تذکرہ کیا ہے، جبکہ میرے پاس امیرالمومنین کے خط سے پہلے اللہ تعالیٰ کی کتاب موجود ہے، میں اللہ کی قسم کھا کر کہتا ہوں کہ اگر کسی انسان پر زمین اور آسمان ڈال دئیے جائیں، لیکن وہ آدمی اللہ تعالیٰ سے تقویٰ اختیار کرے تو اللہ تعالیٰ اس کے لئے کوئی نہ کوئی راہ نجات بنا دیتا ہے، والسلام۔ اس کے بعد حکم بن عمرو نے منادی کو حکم دیا کہ پورے شہر میں اعلان کر دو کہ کل صبح تمام لوگ اپنے مال غنیمت لینے میرے پاس آئیں۔ اگلے دن حکم بن عمرو نے پورا مال لوگوں میں تقسیم کر دیا۔ حکم بن عمرو کے اس عمل پر ناراض ہو کر معاویہ رضی اللہ عنہ نے ان کو معزول کر کے گرفتار کروایا اور قید کر دیا۔ ان کا انتقال قید میں ہی ہوا۔ وہ کہا کرتے تھے ” میرا اختلاف فی سبیل اللہ ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5982]