زبیر بن بکار فرماتے ہیں: منکدر بن عبداللہ، ام المومنین سیدہ عائشہ رضی اللہ عنہا کے پاس آئے اور اپنی حاجت کی شکایت کی۔ ام المومنین رضی اللہ عنہا نے فرمایا: میرے پاس سب سے پہلے جو چیز بھی آئے گی وہ میں تمہاری طرف بھیج دوں گی۔ ام المومنین کے پاس دس ہزار درہم آئے، آپ نے حسب وعدہ وہ تمام منکدر بن عبداللہ کی جانب بھیج دئیے، انہوں نے ان دراہم سے ایک لونڈی خریدی، اس لونڈی سے ان کے بیٹے محمد، ابوبکر، اور عمرو پیدا ہوئے سب کے سب نیک متقی ہوئے اور ان سے احادیث بھی مروی ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6037]

محمد بن منکدر اپنے والد کا یہ بیان نقل کرتے ہیں کہ رسول اللہ صلی اللہ علیہ وسلم نے ارشاد فرمایا: جو شخص ہفتے میں ایک مرتبہ کعبۃ اللہ شریف کا طواف کر لے، اس میں دنیاوی گفتگو نہ کرے، اس کا ثواب ایک غلام آزاد کرنے کے برابر ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6038]