سیدنا ابوایوب انصاری رضی اللہ عنہ فرماتے ہیں کہ جب رسول اللہ صلی اللہ علیہ وسلم میرے گھر میں جلوہ فرما ہوئے، میں نے عرض کی: یا رسول اللہ صلی اللہ علیہ وسلم میرے ماں باپ آپ پر قربان ہو جائیں، مجھے یہ بات اچھی نہیں لگتی کہ آپ نیچے والے مکان میں ہوں اور میں آپ کے اوپر والے مکان میں رہوں۔ رسول اللہ صلی اللہ علیہ وسلم نے فرمایا: لیکن میرے لئے آسانی اسی میں ہے کہ میں نیچے والے مکان میں ہوں کیونکہ میرے پاس لوگوں کا ہجوم رہتا ہے۔ (اور اوپر آنے جانے میں گھر والوں کو پریشانی ہو گی) سیدنا ابوایوب رضی اللہ عنہ فرماتے ہیں: ہمارا ایک مٹکا تھا، وہ ٹوٹ گیا اور اس کا پانی بہنے لگا، ہمارے پاس ایک ہی چادر تھی، میں نے اور میری بیوی نے اس کے ساتھ پانی کو خشک کیا، اس کے علاوہ ہمارے پاس کوئی اور لحاف نہیں تھا، بس خیال یہ تھا کہ رسول اللہ صلی اللہ علیہ وسلم کو کوئی تکلیف نہ پہنچے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6052]

سیدنا ابوایوب انصاری رضی اللہ عنہ فرماتے ہیں کہ نبی اکرم صلی اللہ علیہ وسلم نے ایک مہینہ میرے گھر کو اپنے قیام سے رونق بخشی، اس دوران میں رسول اللہ صلی اللہ علیہ وسلم کے افعال کو بغور دیکھتا رہا، میں نے دیکھا کہ جب سورج ڈھل جاتا تو اس وقت اگر آپ کسی دنیاوی کام میں مشغول بھی ہوتے تو اس کو چھوڑ دیتے، اور اگر آپ سوئے ہوئے ہوتے تو یوں اٹھ جاتے جیسے کسی نے آپ کو اٹھا دیا ہے، آپ غسل کرتے یا وضو کرتے اور ظہر کی نماز ادا کرتے، اس کے بعد بہت خشوع و خضوع کے ساتھ احسن طریقے سے چار رکعتیں ادا کرتے، جب رسول اللہ صلی اللہ علیہ وسلم نے میرے گھر سے جانے کا ارادہ فرمایا: تو میں نے عرض کی: یا رسول اللہ صلی اللہ علیہ وسلم آپ میرے گھر میں صرف ایک مہینہ ہی رہے ہیں، کچھ دیر مزید ٹھہر جائیے نا! رسول اللہ صلی اللہ علیہ وسلم میں نے آپ کے افعال پر بہت غور کیا ہے، میں نے دیکھا ہے کہ جب سورج ڈھل جاتا تو آپ اگر کسی دنیاوی معاملہ میں مصروف بھی ہوتے تب بھی آپ اس کو چھوڑ دیتے اور نماز میں مشغول ہو جاتے، رسول اللہ صلی اللہ علیہ وسلم نے جواباً فرمایا: بے شک آسمان کے دروازے انہی اوقات میں کھلتے ہیں، اور نماز کی ادائیگی تک کھلے رہتے ہیں، میں یہ چاہتا ہوں کہ ان اوقات میں نیکیاں اللہ پاک کی بارگاہ میں پہنچیں، اور یہ کہ میرا عمل عبادت گزاروں کے اعمال میں سب سے پہلے اللہ تعالیٰ کی بارگاہ میں پہنچے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6053]