محمد بن عمر نے ان کا نسب یوں بیان کیا ہے ” ابوقتادہ حارث بن ربعی بن بلدمہ بن خناس بن سنان بن عبیدہ بن عدی بن غنم بن کعب بن سلمہ بن سعد بن علی بن اسد بن ساردہ بن یزید بن جشم بن جراح “ ان کے نام کے بارے میں مؤرخین کا اختلاف ہے۔ محمد بن اسحاق کا کہنا ہے کہ ان کا نام ” نعمان بن ربعی “ ہے۔ بعض دیگر مؤرخین کا موقف ہے کہ ان کا نام عمرو بن ربعی ہے۔ آپ جنگ احد، خندق اور اس کے بعد کے تمام غزوات میں رسول اللہ صلی اللہ علیہ وسلم کے ہمراہ شریک ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6144]

سیدنا ابوقتادہ رضی اللہ عنہ فرماتے ہیں کہ ذی قرد کے دن رسول اللہ صلی اللہ علیہ وسلم نے مجھے دیکھ کر یوں دعا دی ” اے اللہ اس کے بالوں میں اور اس کے چہرے میں برکت عطا فرما، اور کہا، اللہ تعالیٰ تیرے چہرے کو کامیاب کرے، میں نے کہا، یا رسول اللہ صلی اللہ علیہ وسلم اور اللہ تعالیٰ آپ کے چہرے کو بھی کامیاب فرمائے، آپ صلی اللہ علیہ وسلم نے پوچھا: کیا مسعدہ شہید ہو گئے؟ میں نے کہا: جی ہاں یا رسول اللہ صلی اللہ علیہ وسلم ۔ آپ نے پوچھا: یہ تمہارے چہرے پر کیا ہوا ہے؟ میں نے کہا: یا رسول اللہ صلی اللہ علیہ وسلم یہ تیر کا زخم ہے۔ آپ صلی اللہ علیہ وسلم نے فرمایا: میرے قریب آؤ، میں آپ صلی اللہ علیہ وسلم کے قریب ہوا، تو حضور صلی اللہ علیہ وسلم نے میرے چہرے پر اپنا لعاب دہن مبارک لگایا، اس کے بعد نہ تو زخم بہا، اور نہ اس میں درد باقی رہا۔ یحیی بن عبداللہ بن ابی قتادہ اپنے والد کا یہ بیان نقل کرتے ہیں کہ سیدنا ابوقتادہ رضی اللہ عنہ ستر برس کی عمر میں سن 54 ہجری میں مدینہ منورہ میں فوت ہوئے۔ محمد بن عمر فرماتے ہیں: کہ ہمارے علماء میں اس بارے میں کوئی اختلاف نہیں ہے کہ سیدنا ابوقتادہ رضی اللہ عنہ کا انتقال مدینہ منورہ میں ہوا۔ اور اہل کوفہ کا کہنا ہے کہ سیدنا ابوقتادہ کا انتقال کوفہ میں ہوا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6145]