سلیمان بن یسار سے مروی ہے کہ سیدنا عثمان رضی اللہ عنہ کی شہادت سے پہلے، سیدنا ابواسید ساعدی رضی اللہ عنہ کی بینائی زائل ہو گئی تھی۔ آپ کہا کرتے تھے ” اس اللہ کا شکر ہے جس نے مجھے نبی اکرم صلی اللہ علیہ وسلم کی حیات مبارکہ میں بینائی سے نوازا، پھر جب اللہ تعالیٰ نے لوگوں کو آزمائش میں ڈالنا چاہا تو میری بصارت ختم کر دی۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6314]

مصعب بن عبداللہ بیان کرتے ہیں: جماعت کا سال 40 ہجری ہے۔ سیدنا ابواسید مالک بن ربیعہ بن عامر بن عوف بن خزرج بن ساعدہ “ ہیں۔ بدری صحابہ میں سب سے آخر میں یہی فوت ہوئے۔ یہ وہی صحابی ہیں جنہوں نے جنگ بدر کے دن ملائکہ کو دیکھا تھا۔ ان کی بینائی زائل ہو گئی تھی۔ آپ رسول اللہ صلی اللہ علیہ وسلم کی ازواج مطہرات کے امین ہوا کرتے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6315]

یحیی بن بکیر فرماتے ہیں: ابواسید ساعدی رضی اللہ عنہ 60 ہجری کو فوت ہوئے، وفات کے وقت ان کی عمر 92 سال تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6316]

عباس بن سہل بن سعد ساعدی فرماتے ہیں: میں نے ابواسید ساعدی رضی اللہ عنہ کو ان کی بینائی زائل ہو جانے کے بعد دیکھا ہے، آپ کوتاہ قد، گٹھے ہوئے جسم والے تھے، آپ کے سر اور داڑھی شریف کے بال سفید تھے۔ میں نے ان کا سر دیکھا ہے، آپ کے سر پر بہت زیادہ بال تھے۔ سیدنا ابواسید رضی اللہ عنہ سن 60 ہجری میں مدینہ منورہ میں فوت ہوئے، وفات کے وقت ان کی عمر 98 برس تھی۔ بدری صحابہ کرام میں سب سے آخر میں انہی کا انتقال ہوا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6317]