ابو اسحاق بیان کرتے ہیں کہ لوگ نمازِ استسقاء کے لیے نکلے اور ان میں سیدنا زید بن ارقم رضی اللہ عنہ بھی موجود تھے، میرے اور ان کے درمیان صرف ایک آدمی کا فاصلہ تھا، میں نے ان سے پوچھا: ”اے ابو عمرو! نبی کریم صلی اللہ علیہ وسلم نے کتنے غزوات فرمائے؟“ انہوں نے جواب دیا: ”انیس،“ میں نے پوچھا: ”آپ خود آپ صلی اللہ علیہ وسلم کے ہمراہ کتنے غزوات میں شریک رہے؟“ انہوں نے فرمایا: ”سترہ۔“
یہ حدیث شیخین کی شرط پر صحیح ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6402]

سیدنا زید بن ارقم رضی اللہ عنہ سے روایت ہے کہ ہم رسول اللہ صلی اللہ علیہ وسلم کے ساتھ نکلے یہاں تک کہ جب ہم غدیرِ خم کے مقام پر پہنچے تو آپ صلی اللہ علیہ وسلم نے درختوں کے سائے میں جگہ صاف کرنے کا حکم دیا، اس دن اس قدر شدید گرمی تھی کہ ہمیں کبھی اس سے زیادہ سخت گرم دن کا سامنا نہیں کرنا پڑا تھا، پھر آپ صلی اللہ علیہ وسلم نے اللہ کی حمد و ثنا بیان کی اور فرمایا: ”اے لوگو! کوئی ایسا نبی مبعوث نہیں ہوا جس کی عمر اس سے پہلے گزرنے والے نبی کی عمر کے آدھے کے برابر نہ رہی ہو، اور مجھے گمان ہے کہ عنقریب مجھے (رب کی طرف سے) بلاوا آئے گا اور میں اسے قبول کر لوں گا، میں تمہارے درمیان ایسی چیز چھوڑے جا رہا ہوں جس کے بعد تم کبھی گمراہ نہیں ہو گے اور وہ اللہ عزوجل کی کتاب ہے،“ پھر آپ صلی اللہ علیہ وسلم کھڑے ہوئے اور سیدنا علی رضی اللہ عنہ کا ہاتھ تھام کر فرمایا: ”اے لوگو! تمہاری جانوں پر تم سے زیادہ حق کس کا ہے؟“ سب نے عرض کیا: اللہ اور اس کا رسول بہتر جانتے ہیں، آپ صلی اللہ علیہ وسلم نے فرمایا: ”جس کا میں مولا ہوں، علی بھی اس کا مولا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6403]