سیدنا ابوصالح فرماتے ہیں: میں نے سیدنا عبداللہ بن عباس رضی اللہ عنہما کی مجلس دیکھی ہے، اگر اس پر پورا قریش فخر کرے تو واقعی یہ فخر کی بات ہے۔ میں نے دیکھا ہے کہ لوگوں کا اتنا ہجوم ہو جاتا تھا کہ گلیوں اور بازاروں میں جگہ اتنی تنگ پڑ جاتی کہ آمدورفت بالکل بند ہو جاتی۔ آپ فرماتے ہیں: میں ان سے ملنے کے لئے گیا، میں نے ان کو بتایا کہ عوام ان کے دروازے تک پہنچ چکی ہے۔ آپ نے مجھے فرمایا: میرے لئے وضو کے پانی کا انتظام کرو، پھر انہوں نے وضو کیا اور بیٹھ گئے اور مجھے فرمایا: جاؤ، لوگوں سے کہہ دو کہ جو کوئی قرآن پاک اور اس کے حروف کے متعلق پوچھنا چاہتا ہو، وہ اندر آ جائے۔ میں نے باہر جا کر یہ اعلان کر دیا تو اتنے لوگ اندر آ گئے کہ ان کا حجرہ اور پورا گھر بھر گیا، پھر جس نے جو بھی سوال کیا، سیدنا عبداللہ بن عباس رضی اللہ عنہما نے اس کا شافی جواب دیا۔ بلکہ اس کے سوال سے کہیں زیادہ جواب دیا۔ پھر آپ نے فرمایا: اب تم اپنے باہر والے بھائیوں کو بھی وقت دو، تو سب لوگ وہاں سے باہر آ گئے۔ آپ نے پھر مجھے فرمایا: باہر چلے جاؤ، اور اعلان کر دو کہ جو شخص حلال و حرام اور فقہ کے بارے میں کچھ پوچھنا چاہتا ہے وہ اندر آ جائے۔ میں نے باہر جا کر یہ اعلان کر دیا، پھر اتنے لوگ اندر آئے کہ ان کا حجرہ اور پورا گھر لوگوں سے بھر گیا، ان میں سے جس نے جو بھی سوال کیا، آپ نے اس کے سوال سے بڑھ کر اس کو جواب دیا۔ پھر ان کو فرمایا کہ اپنے باہر والے بھائیوں کو بھی موقع دو، یہ لوگ باہر آ گئے۔ آپ نے پھر مجھے فرمایا: باہر چلے جاؤ اور اعلان کر دو کہ جو شخص وراثت یا اسی سے ملتے جلتے کسی موضوع پر سوال کرنا چاہتا ہو، وہ اندر آ جائے، میں نے باہر جا کر اعلان کر دیا، اب بھی اتنے لوگ اندر آئے کہ ان کا حجرہ اور سارا گھر بھر گیا۔ ان میں سے جس نے جو بھی سوال کیا، آپ نے اس کے سوال سے بڑھ کر اس کو جواب دیا۔ آپ نے پھر فرمایا: اپنے باہر والے بھائیوں کو موقع دو، یہ لوگ باہر چلے گئے، آپ نے پھر مجھے فرمایا: باہر جا کر اعلان کر دو کہ جو کوئی عربی زبان، شعر یا کسی غریب کلام کے بارے میں کچھ پوچھنا چاہتا ہو، وہ اندر آ جائے، میں نے اعلان کر دیا، تو اتنے لوگ اندر آ گئے کہ آپ کا حجرہ اور پورا گھر لوگوں سے بھر گیا، ان میں سے جس نے جو بھی سوال کیا، آپ نے اس کے سوال سے بڑھ کر اس کو جواب دیا۔ ابوصالح کہتے ہیں: اگر پورا قریش ان پر فخر کرے تو واقعی یہ ان کے لئے فخر کی بات ہے۔ میں نے ان جیسا کوئی انسان نہیں دیکھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6426]

سیدنا عبداللہ بن عباس رضی اللہ عنہما فرماتے ہیں: جب رسول اللہ صلی اللہ علیہ وسلم وصال فرما گئے تو میں نے ایک انصاری شخص سے کہا: اے فلاں شخص تم آؤ، ہم علم طلب کر لیں کیونکہ ابھی رسول اللہ صلی اللہ علیہ وسلم کے اصحاب زندہ ہیں۔ اس نے کہا: اے ابن عباس رضی اللہ عنہما مجھے تو تم پر حیرانگی ہو رہی ہے، تم دیکھتے ہو کہ لوگ علم میں تمہارے محتاج ہیں، اور لوگوں میں رسول اللہ صلی اللہ علیہ وسلم کے صحابہ میں سے کون ہیں؟ سیدنا عبداللہ بن عباس رضی اللہ عنہما نے فرمایا: میں نے وہ سلسلہ چھوڑ دیا ہے اور علم حاصل کرنا شروع کر دیا ہے۔ مجھے پتا چلا کہ فلاں شخص کے پاس ایک حدیث موجود ہے جو کہ اس نے خود رسول اللہ صلی اللہ علیہ وسلم سے سنی ہے تو میں جا کر اس کے دروازے کے باہر بیٹھ گیا، ہواؤں نے گرد و غبار اڑا اڑا کر میرے چہرے پر ڈال دیا تھا، اس آدمی نے جب باہر نکل کر مجھے دیکھا تو وہ کہنے لگا: اے رسول اللہ صلی اللہ علیہ وسلم کے چچا زاد! آپ کس لئے تشریف لائے ہیں؟ آپ کو ہم سے کیا کام ہے؟ میں نے کہا: مجھے معلوم ہوا ہے کہ تمہارے پاس رسول اللہ صلی اللہ علیہ وسلم کی ایک حدیث ہے جو تم بیان کرتے ہو۔ (میں وہ حدیث سننے کے لئے آیا ہوں) اس آدمی نے کہا: آپ مجھے پیغام بھیج دیتے، میں خود آپ کے پاس چلا آتا، تو میں نے کہا: میرا زیادہ حق بنتا ہے کہ میں چل کر آپ کے پاس آؤں، وہ آدمی ابھی زندہ تھا کہ لوگ میرے پاس جمع ہونے لگ گئے، تو وہ آدمی کہا کرتا تھا: یہ نوجوان مجھ سے زیادہ سمجھدار ہے۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6427]