عروہ سے انصار کے ان صحابہ کے ناموں کے تذکرہ میں جو غزوہ بدر میں شریک تھے، روایت ہے کہ بنو بیاضہ بن عامر بن زریق سے زیاد بن لبید بن ثعلبہ بن سنان بن عامر بن عدی بن امیہ بن بیاضہ بھی شامل تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6695M1]

ابن شہاب سے انصار کے ان صحابہ کے ناموں کے تذکرہ میں جو بیعت عقبہ میں شریک تھے، روایت ہے کہ بنو بیاضہ سے زیاد بن لبید بھی شامل تھے اور وہ غزوہ بدر میں بھی شریک ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6695M2]

سیدنا زیاد بن لبید انصاری رضی اللہ عنہ سے روایت ہے، انہوں نے کہا: میں نبی کریم صلی اللہ علیہ وسلم کی خدمت میں حاضر ہوا جبکہ آپ اپنے صحابہ سے گفتگو فرما رہے تھے اور فرما رہے تھے: ”علم (کے رخصت ہونے) کا وقت آ گیا ہے“، میں نے عرض کی: میرے ماں باپ آپ پر قربان ہوں، علم کیسے رخصت ہو گا جبکہ ہم قرآن پڑھتے ہیں، اپنے بیٹوں کو پڑھاتے ہیں اور ہمارے بیٹے اپنے بیٹوں کو قیامت تک پڑھاتے رہیں گے؟! آپ صلی اللہ علیہ وسلم نے فرمایا: ”اے ابن لبید! تمہاری ماں تمہیں گم پائے، میں تو تمہیں اہل مدینہ میں سب سے زیادہ سمجھدار سمجھتا تھا، کیا یہودی اور نصرانی تورات اور انجیل نہیں پڑھتے لیکن وہ ان سے ذرہ برابر بھی فائدہ نہیں اٹھاتے؟“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔
(اس کے بعد) سیدنا سعد بن ربیع انصاری رضی اللہ عنہ کا ذکر ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6695M3]

عروہ سے انصار کے ان مسلمانوں کے ناموں کے تذکرہ میں جنہوں نے بیعت عقبہ میں رسول اللہ صلی اللہ علیہ وسلم کی بیعت کی، روایت ہے کہ بنو حارث بن خزرج سے سعد بن ربیع بن عمرو بن ابی زہیر بن مالک بن امرء القیس بن ثعلبہ بن کعب بن خزرج بن حارث شامل تھے، وہ نقیب تھے اور انہوں نے غزوہ بدر میں بھی شرکت کی تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6696]

ابن شہاب سے انصار کے ان شہداء کے ناموں کے تذکرہ میں جو غزوہ احد میں شہید ہوئے، روایت ہے کہ بنو حارث بن خزرج سے سیدنا سعد بن ربیع رضی اللہ عنہ بھی شامل تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6697]

ام سعد بنت سعد بن ربیع سے روایت ہے کہ وہ سیدنا ابوبکر صدیق رضی اللہ عنہ کے پاس آئیں، تو انہوں نے ان کے لیے اپنی چادر بچھا دی یہاں تک کہ وہ اس پر بیٹھ گئیں، پھر سیدنا عمر بن خطاب رضی اللہ عنہ ان کے پاس آئے اور پوچھا: اے خلیفہ رسول! یہ کون ہیں؟ انہوں نے فرمایا: ”یہ اس شخص کی بیٹی ہے جو مجھ سے اور تم سے بہتر تھا“، سیدنا عمر رضی اللہ عنہ نے پوچھا: ”رسول اللہ صلی اللہ علیہ وسلم کے علاوہ وہ کون ہے جو مجھ سے اور آپ سے بہتر ہو؟“ سیدنا ابوبکر رضی اللہ عنہ نے فرمایا: ”وہ شخص جو رسول اللہ صلی اللہ علیہ وسلم کے عہد میں (شہید ہو کر) وفات پا گیا اور جنت میں اپنا ٹھکانا بنا لیا، جبکہ میں اور تم (آزمائش کے لیے) باقی رہ گئے۔“
یہ حدیث صحیح الاسناد ہے لیکن شیخین نے اسے روایت نہیں کیا۔
(اس کے بعد) سیدنا سعد قرظ مؤذن رضی اللہ عنہ کا ذکر ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6698]