خلیفہ بن خیاط نے ان کا نسب یوں بیان کیا ہے ” عیاض بن زہیر بن ابی شداد بن ربیعہ بن ہلال بن وہیب بن ضبہ بن حارث بن فہر الفہری “۔ آپ غزوہ بدر میں شریک ہوئے، اور سن 30 ہجری کو شام میں وفات پائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6792]

مصعب بن عبداللہ نے ان کا نسب یوں بیان کیا ہے ” عبداللہ بن حذافہ بن قیس بن عدی بن سعید بن سہم “ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6793]

سیدنا ابوسعید خدری رضی اللہ عنہ فرماتے ہیں: نبی اکرم صلی اللہ علیہ وسلم نے علقمہ بن محرز رضی اللہ عنہ کو ایک لشکر میں بھیجا، جب ہم میدان جنگ کے قریب پہنچے تو لشکر کی ایک جماعت کو انہوں نے اجازت دی اور عبداللہ بن حذافہ بن قیس سہمی رضی اللہ عنہ کو ان کا امیر مقرر فرمایا۔ آپ بدری صحابہ میں سے ہیں، اور ان میں خوش طبعی کی عادت تھی بعض اوقات سفروں میں وہ رسول اللہ صلی اللہ علیہ وسلم کو خوش کرنے کے لئے آپ صلی اللہ علیہ وسلم کی اونٹنی کو چلایا کرتے تھے۔ سیدنا عمر بن خطاب رضی اللہ عنہ کے دور خلافت میں روم نے ان کو گرفتار کر لیا تھا، انہوں نے ان کو کفر اختیار کرنے پر بہت مجبور کیا، لیکن اللہ تعالیٰ نے ان کو کفر سے محفوظ رکھا حتیٰ کہ اللہ تعالیٰ نے ان کو ان کی قید سے رہائی عطا فرما دی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6794]

سیدنا عبداللہ بن حذافہ سہمی رضی اللہ عنہ فرماتے ہیں: رسول اللہ صلی اللہ علیہ وسلم نے مجھے حکم دیا کہ میں اہل منیٰ میں یہ اعلان کر دوں کہ ” خبردار! ان دنوں میں کوئی شخص روزہ نہ رکھے، کیونکہ یہ کھانے پینے کے دن ہیں “۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6795]