ام المومنین سیدہ عائشہ رضی اللہ عنہا فرماتی ہیں: رسول اللہ صلی اللہ علیہ وسلم نے سیدہ فاطمہ رضی اللہ عنہا کا ذکر کیا۔ آپ فرماتی ہیں: میں نے کہا: (وہ تو فاطمہ کی فضیلت ہے،) میں کہاں گئی؟ رسول اللہ صلی اللہ علیہ وسلم نے فرمایا: کیا تم اس بات پر راضی نہیں ہو کہ تم دنیا اور آخرت میں میری بیوی ہو؟ میں نے کہا: اللہ کی قسم! میں راضی ہوں۔ آپ صلی اللہ علیہ وسلم نے فرمایا: تو تم دنیا آخرت میں میری بیوی ہو۔ ٭٭ اس حدیث کے راوی ابوالعنبس (کا اصل نام) سعید بن کثیر ہے، مدنی ہیں، ثقہ ہیں، اور یہ حدیث صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6878]

عبدالرحمن بن ضحاک بیان کرتے ہیں کہ عبداللہ بن صفوان اور ایک دوسرا شخص ام المومنین سیدہ عائشہ رضی اللہ عنہا کے پاس آئے، ام المومنین سیدہ عائشہ رضی اللہ عنہا نے ان میں سے ایک سے فرمایا: اے فلاں! کیا تم نے حفصہ والی بات سنی ہے؟ اس نے کہا: جی ہاں اے ام المومنین۔ سیدنا عبداللہ بن صفوان رضی اللہ عنہ نے پوچھا: اے ام المومنین! وہ کون سی بات ہے؟ ام المومنین نے فرمایا: میری نو خاصیتیں ایسی ہیں جو مجھ سے پہلے کسی خاتون کو نصیب نہیں ہوئیں، سوائے اس فضیلت کے جو کہ اللہ تعالیٰ نے سیدنا مریم بنت عمران رضی اللہ عنہا کو عطا فرمائی ہے۔ اللہ کی قسم! میں اپنی ساتھیوں (دیگر امہات المومنین) پر فخر کرتے ہوئے نہیں کہہ رہی ہوں۔ سیدنا عبداللہ بن صفوان رضی اللہ عنہ نے کہا: اے ام المومنین! وہ نو خاصیتیں کون کون سی ہیں؟ ام المومنین سیدہ عائشہ رضی اللہ عنہا نے فرمایا: * فرشتہ میری تصویر رسول اللہ صلی اللہ علیہ وسلم کے پاس لایا۔ * رسول اللہ صلی اللہ علیہ وسلم نے مجھ سے نکاح کیا، اس وقت میری عمر 7 برس تھی۔ * میری رخصتی عمل میں آئی تو اس وقت میری عمر 9 برس تھی۔ * حضور صلی اللہ علیہ وسلم کی ازواج میں کنواری صرف میں ہوں۔ * حضور صلی اللہ علیہ وسلم اور میں ایک لحاف میں ہوتے تھے اور عین اس حال میں آپ صلی اللہ علیہ وسلم پر وحی نازل ہوا کرتی تھی۔ * رسول اللہ صلی اللہ علیہ وسلم سب سے زیادہ مجھ سے محبت کرتے تھے۔ * میرے حق میں قرآن کریم کی آیات نازل ہوئیں، جبکہ لوگ ہلاک ہونے کے قریب ہو چکے تھے۔ * میں نے سیدنا جبریل امین علیہ السلام کی زیارت کی ہے۔ * آپ صلی اللہ علیہ وسلم کا وصال میرے حجرے میں ہوا، اس وقت ملک الموت کے علاوہ صرف میں ہی آپ صلی اللہ علیہ وسلم کے پاس تھی۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6879]

سیدنا عبداللہ بن عباس رضی اللہ عنہما فرماتے ہیں: سورۃ النور کی آیت نمبر 23: إِنَّ الَّذِينَ يَرْمُونَ الْمُحْصَنَاتِ الْغَافِلَاتِ الْمُؤْمِنَاتِ لُعِنُوا فِي الدُّنْيَا وَالْآخِرَةِ وَلَهُمْ عَذَابٌ عَظِيمٌ ” بیشک وہ جو عیب لگاتے ہیں انجان پارسا ایمان والیوں کو ان پر لعنت ہے دنیا اور آخرت میں اور ان کے لئے بڑا عذاب ہے “ بالخصوص سیدہ عائشہ صدیقہ رضی اللہ عنہا کے حق میں نازل ہوئی۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6880]