سیدہ عائشہ رضی اللہ عنہا کے آزاد کردہ غلام ابوعمرو کہتے ہیں: عراق سے ایک تابوت سیدنا عمر رضی اللہ عنہ کے پاس آیا، اس میں ہیرا تھا۔ سیدنا عمر رضی اللہ عنہ نے اپنے ساتھیوں سے کہا: تم جانتے ہو کہ اس کی قیمت کیا ہے؟ انہوں نے کہا: جی نہیں۔ اور ان کو یہ سمجھ نہیں آ رہی تھی کہ اس کو تقسیم کیسے کیا جائے۔ سیدنا عمر رضی اللہ عنہ نے فرمایا: اگر تم لوگ اجازت دو تو میں یہ ہیرا ام المومنین سیدہ عائشہ رضی اللہ عنہا کو بھیج دیتا ہوں کیونکہ رسول اللہ صلی اللہ علیہ وسلم ان سے بہت محبت کرتے تھے۔ سب لوگوں نے متفقہ طور پر اجازت دے دی۔ سیدنا عمر رضی اللہ عنہ نے وہ صندوق سیدہ عائشہ رضی اللہ عنہا کی خدمت میں بھیج دیا۔ ام المومنین نے اس کو کھول کر دیکھا تو بے ساختہ بول اٹھیں: رسول اللہ صلی اللہ علیہ وسلم کے بعد ابن خطاب رضی اللہ عنہ پر فتوحات کا کیسا دروازہ کھلا ہے، اے اللہ! تو مجھے آئندہ ان کے عطیہ کے لئے باقی نہ رکھنا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6874]

ابن ابی ملیکہ فرماتے ہیں: جب ام المومنین سیدہ عائشہ رضی اللہ عنہا بیمار ہوئیں تو سیدنا عبداللہ بن عباس رضی اللہ عنہما ان کی عیادت کے لئے آئے، اندر آنے کی اجازت مانگی، ام المومنین نے اجازت نہ دی، ام المومنین کے بھتیجوں نے سفارش کی کہ آپ ان کو اجازت دے دیجئے، یہ تو آپ کے خیرخواہ ہیں، ام المومنین نے پھر انکار کیا، وہ لوگ مسلسل سفارش کرتے رہے، بالآخر انہوں نے اجازت دے دی۔ جب سیدنا عبداللہ بن عباس رضی اللہ عنہما ان کے پاس آئے اور کہنے لگے:” آپ کی سعادت مندی کی بناء پر آپ کا نام ” ام المومنین “ ہے، اور آپ کا یہ نام آپ کی پیدائش سے بھی پہلے کا ہے، رسول اللہ صلی اللہ علیہ وسلم سب سے زیادہ آپ سے محبت کرتے تھے، اور رسول اللہ صلی اللہ علیہ وسلم آپ ہی سے محبت کرتے تھے، جب تک جسم میں روح ہے، آپ سے محبت کرنے والے آپ سے ملنے آتے رہیں گے، ابواء کی رات آپ کا ہار گم ہو گیا تھا، اللہ تعالیٰ نے وہ بھی امت کے لئے بہتر کر دیا۔ اللہ تعالیٰ نے تیمم کے احکام والی آیت نازل فرمائی۔ آپ کے حق میں قرآن کی آیات نازل ہوئیں۔ مسلمانوں کی ہر مسجد میں دن رات آپ کے عذر کی آیات تلاوت ہوتی رہیں گی۔ ام المومنین نے کہا: اے ابن عباس مجھے میرے حال پر چھوڑ دو، میں چاہتی ہوں، کاش کہ میں نسیا منسیا ہو جاتی (یعنی میرا نام و نشان تک مٹ جائے)۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6875]

ام المومنین سیدہ عائشہ رضی اللہ عنہا فرماتی ہیں: میری شادی سے پہلے سیدنا جبریل امین علیہ السلام نے میری تصویر لا کر رسول اللہ صلی اللہ علیہ وسلم کو دکھائی اور کہا: یہ آپ کی بیوی ہے۔ آپ صلی اللہ علیہ وسلم نے مجھ سے نکاح کیا، میں اس وقت چھوٹی بچی تھی، جب آپ صلی اللہ علیہ وسلم نے مجھ سے نکاح کر لیا، اللہ تعالیٰ نے مجھ پر حیاء القاء فرما دیا میں اس وقت چھوٹی تھی۔ ٭٭ زہری کہتے ہیں: حوف ایک تسمہ ہے جو کمر پر باندھا جاتا ہے۔ (یہ ازار نما چمڑے کی ایک چیز ہوتی ہے جس کو بچے پہنتے ہیں: المنجد) [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6876]

ام سلمہ رضی اللہ عنہا فرماتی ہیں: میری ساتھیوں (دیگر ازواج) نے مجھے کہا کہ میں رسول اللہ صلی اللہ علیہ وسلم سے بات کروں کہ آپ لوگوں کو حکم دیں کہ وہ جس زوجہ کے گھر ہوں وہ وہیں پر اپنے تحائف بھیجا کریں۔ کیونکہ لوگ تحائف بھیجنے کے لئے سیدہ عائشہ رضی اللہ عنہا کی باری کا انتظار کیا کرتے تھے، اور یہ کہ ہم بھی اسی طرح بھلائی چاہتی ہیں، جیسے عائشہ رضی اللہ عنہا چاہتی ہے۔ (میں نے یہ بات کہی تو) رسول اللہ صلی اللہ علیہ وسلم نے خاموشی اختیار فرمائی، اور مجھے کوئی جواب نہ دیا۔ میری ساتھی میرے پاس آئیں، میں نے ان کو بتایا کہ رسول اللہ صلی اللہ علیہ وسلم نے تو مجھے کوئی جواب نہیں دیا۔ انہوں نے کہا: تم حضور صلی اللہ علیہ وسلم کے پیچھے لگی رہو، اور بار بار یہ بات کہتی رہو۔ حضور صلی اللہ علیہ وسلم جب اگلی مرتبہ ان کی باری پر ان کے گھر تشریف لائے تو انہوں نے کہا: میری سہیلیوں نے کہا ہے کہ میں آپ سے بات کروں کہ آپ لوگوں کو حکم دے دیں کہ میں جہاں ہوں، اپنے تحائف وغیرہ وہیں بھیجا کرو، میں نے حضور صلی اللہ علیہ وسلم کی بارگاہ میں دو یا تین مرتبہ یہ بات کہی، لیکن ہر بار حضور صلی اللہ علیہ وسلم خاموشی اختیار فرماتے۔ (آخری بار جب میں نے یہی بات کہی تو) حضور صلی اللہ علیہ وسلم نے فرمایا: اے ام سلمہ! تم عائشہ کے حوالے سے مجھے ٹینشن مت دیا کرو۔ کیونکہ صرف عائشہ وہ خاتون ہیں جن کے بستر میں بھی مجھ پر وحی نازل ہوتی ہے۔ سیدہ ام سلمہ رضی اللہ عنہا نے کہا: عائشہ کے حوالے سے آپ کو تکلیف دینے سے میں اللہ تعالیٰ کی پناہ مانگتی ہوں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6877]