سیدہ صفیہ بنت عبدالمطلب فرماتی ہیں کہ جنگ خندق کے موقع پر رسول اللہ صلی اللہ علیہ وسلم نے اپنی ازواج کو فارع نامی قلعہ میں رکھا تھا۔ سیدنا حسان بن ثابت رضی اللہ عنہ کو ان کا نگران مقرر کر دیا، کچھ یہودی نبی اکرم صلی اللہ علیہ وسلم کی ازواج کا ” اطم “ ڈھونڈتے ہوئے ادھر آ نکلے، ایک انسان نے اوپر چڑھ کر ” اطم “ سے ہماری طرف جھانکا، میں نے کہا: اے حسان! اٹھو اور اس کو قتل کر دو، سیدنا حسان رضی اللہ عنہ نے کہا: اللہ کی قسم! میرے اندر اتنی طاقت نہیں ہے، اگر مجھ میں اتنی ہمت ہوتی تو میں رسول اللہ صلی اللہ علیہ وسلم کے ساتھ جنگ میں ہوتا، میں نے ان سے کہا: یہ تلوار میرے بازو پر باندھ دو، انہوں نے تلوار میرے بازو پر باندھ دی، میں اٹھی اور اس کے سر پر کاری وار کر کے اس کا سر کاٹ ڈالا۔ میں نے سیدنا حسان رضی اللہ عنہ سے کہا: اس سر کو کانوں سے پکڑ کر ان کی طرف پھینک دو، سیدنا حسان رضی اللہ عنہ نے کہا: اللہ کی قسم! مجھ میں اتنی ہمت نہیں ہے، چنانچہ میں نے خود اس کا سر پکڑ کر یہودیوں کی طرف پھینک دیا، یہ دیکھتے ہی وہ لرزہ براندام ہو گئے اور کہنے لگے: ہم تو یہ سمجھے تھے محمد نے اپنی عورتوں کے پاس کسی کو چھوڑا ہی نہیں ہے، رسول اللہ صلی اللہ علیہ وسلم کی عادت کریمہ تھی کہ جب مشرکین پر چڑھائی کرتے تو حسان رضی اللہ عنہ کو یہ معاملہ بہت سخت محسوس ہوتا تو وہ ہمارے ساتھ قلعہ میں ہوتے، جب رسول اللہ صلی اللہ علیہ وسلم واپس آتے تو حسان رضی اللہ عنہ بھی آپ صلی اللہ علیہ وسلم کے پیچھے پیچھے آتے (دیکھنے والا سمجھتا کہ وہ بھی رسول اللہ صلی اللہ علیہ وسلم کے ہمراہ آئے ہیں) اس کے بعد سیدنا سعد بن معاذ رضی اللہ عنہ ہمارے پاس سے گزرے، ان کے مہندی لگی ہوئی تھی، کیونکہ ابھی نئی نئی شادی ہوئی تھی، وہ درج ذیل رجزیہ اشعار پڑھ رہے تھے۔ ” تھوڑا ہی وقت ہے جب اونٹ بھڑکتی ہوئی (جنگ تک) پہنچ جائے گا، جب وقت پورا ہو جائے تو پھر موت میں کوئی حرج نہیں ہے “۔ ام المومنین سیدہ عائشہ رضی اللہ عنہا فرماتی ہیں: اس دن سعد جس قدر خوبصورت لگ رہے تھے، میں نے اس سے زیادہ خوبصورت کوئی مرد نہیں دیکھا۔ ٭٭ یہ حدیث کبیر ہے، اس اسناد کے ہمراہ غریب ہے، جبکہ یہی حدیث صحیح اسناد کے ہمراہ بھی مروی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7039]