ابوبکر بن سلیمان بن ابی حثمہ قرشی رحمۃ اللہ علیہ ایک انصاری کے بارے میں بیان کرتے ہیں کہ اس کو چیونٹی نے کاٹ لیا، کسی نے اس کو بتایا کہ شفاء بت عبداللہ رضی اللہ عنہا چیونٹی کے کاٹے کا دم کرتی ہے، وہ سیدنا شفاء بنت عبداللہ کے پاس آ گئے، اور ان سے دم کرنے کا کہا، (انہوں نے معذرت کرتے ہوئے کہا:) میں جب سے اسلام لائی ہوں، تب سے کبھی بھی دم نہیں کیا۔ وہ انصاری شخص رسول اللہ صلی اللہ علیہ وسلم کی بارگاہ میں حاضر ہو گیا، اور شفاء بنت عبداللہ کی شکایت کی۔ رسول اللہ صلی اللہ علیہ وسلم نے شفاء بنت عبداللہ کو بلوایا (جب وہ آ گئیں تو) آپ صلی اللہ علیہ وسلم نے فرمایا: وہ دم میرے سامنے پیش کرو، انہوں نے رسول اللہ صلی اللہ علیہ وسلم کو وہ دم سنایا۔ حضور صلی اللہ علیہ وسلم نے فرمایا: اس کو دم کر دو (کیونکہ اس دم میں کوئی کفریہ کلمات نہیں تھے) اور یہ دم حفصہ کو بھی سکھا دو۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے۔ ابوبکر بن سلیمان نے اپنے دادا سے حدیث کا سماع کیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7062]