کریب بن سلیمان الکندی فرماتے ہیں: علی بن حسین بن علی رضی اللہ عنہما نے میرا ہاتھ پکڑا اور بنی زہرہ سے تعلق رکھنے والے ایک قرشی آدمی کے پاس مجھے لے گئے، اس آدمی کو ابن ابی حثمہ کے نام سے پکارا جاتا ہے، وہ ان کے قریب ہی نماز پڑھ رہے تھے۔ جب ابن ابی حثمہ رضی اللہ عنہ نماز سے فارغ ہوئے تو ہماری جانب متوجہ ہوئے، سیدنا علی بن حسین نے ان سے کہا: دم کے بارے میں ایک حدیث، آپ اپنی والدہ کے حوالے سے بیان کرتے ہو، انہوں نے کہا: جی ہاں، وہ حدیث مجھے میری والدہ نے بتائی تھی، (وہ یہ ہے کہ میری والدہ) زمانہ جاہلیت میں دم کیا کرتی تھی، جب اسلام کا زمانہ آ گیا تو انہوں نے فیصلہ کیا کہ میں رسول اللہ صلی اللہ علیہ وسلم سے مشورہ کروں گی (اگر حضور صلی اللہ علیہ وسلم اجازت دیں گے تو) میں دم کروں گی (ورنہ چھوڑ دوں گی، انہوں نے رسول اللہ صلی اللہ علیہ وسلم سے مشورہ کیا تو) نبی اکرم صلی اللہ علیہ وسلم نے فرمایا: تم دم کیا کرو، جب تک اس میں شرک کی آمیزش نہ ہو (تب تک دم کرنا جائز ہے) [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7063]

عثمان بن سلیمان اپنے والد کے حوالے سے ان کی والدہ سیدنا شفاء بنت عبداللہ کے بارے میں بیان کرتے ہیں کہ وہ زمانہ جاہلیت میں دم کیا کرتی تھی، جب وہ ہجرت کر کے مدینہ منورہ آئیں تو وہ رسول اللہ صلی اللہ علیہ وسلم کی خدمت میں حاضر ہوئیں، اور عرض کی: یا رسول اللہ صلی اللہ علیہ وسلم میں زمانہ جاہلیت میں دم کیا کرتی تھی، میں وہ دم آپ کو سنانا چاہتی ہوں، حضور صلی اللہ علیہ وسلم نے اجازت عطا فرمائی، انہوں نے حضور صلی اللہ علیہ وسلم کو دم سنایا۔ اس میں چیونٹی کے کاٹے کا بھی دم تھا، نبی اکرم صلی اللہ علیہ وسلم نے فرمایا: یہ دم کر دیا کرو اور یہ حفصہ کو بھی سکھا دو، وہ دم یہ تھا۔ بِسْمِ اللَّهِ صَلُوبٌ حِينَ يَعُودُ مِنْ أَفْوَاهِهَا وَلَا تَضُرُّ أَحَدًا، اللَّهُمَّ اكْشِفِ الْبَأْسَ رَبَّ النَّاسِ ” اللہ کے نام سے شروع وہ سختی والا ہے، جب وہ مونہوں سے لوٹے، اور کسی کو نقصان نہ دے، اے اللہ، اے انسانوں کے رب، تکلیف دور فرما دے “۔ راوی کہتے ہیں: یہ دعا سات مرتبہ پڑھ کر انگور کی ٹہنی پر دم کرتی، پھر اس کو ایک پاک صاف جگہ پر رکھ دیتی، پھر اس کو پتھر پر رگڑتی، اور اس کے اوپر قلعی کی لیپ کر دیتی۔ (پھر یہ لکڑی کاٹے کے مقام پر لگاتی تو درد فوراً ختم ہو جاتا۔) [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7064]

اصمعی کہتے ہیں: (مذکورہ دونوں حدیثوں میں جو چیونٹی کا ذکر ہے اس چیونٹی یعنی) نملہ سے مراد وہ کیڑا ہے جو بغلوں وغیرہ میں پیدا ہو جاتا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7065]