عمرو بن شعیب اپنے والد سے، وہ ان کے دادا سے روایت کرتے ہیں کہ ام نبیہ بنت حجاج ام عبداللہ بن عمرو ایسی خاتون تھیں جو رسول اللہ صلی اللہ علیہ وسلم کی بارگاہ میں تحائف بھیجا کرتی تھیں اور رسول اللہ صلی اللہ علیہ وسلم کے ساتھ بہت اچھا سلوک کرتی تھیں۔ ایک دن رسول اللہ صلی اللہ علیہ وسلم ان کے پاس ملاقات کے لئے تشریف لائے آپ صلی اللہ علیہ وسلم نے ان کا حال دریافت فرمایا، انہوں نے کہا: یا رسول اللہ صلی اللہ علیہ وسلم میرے ماں باپ آپ پر قربان ہو جائیں، میں ٹھیک ہوں، آپ صلی اللہ علیہ وسلم نے پوچھا: عبداللہ کا کیا حال ہے؟ انہوں نے کہا: یا رسول اللہ صلی اللہ علیہ وسلم وہ بھی ٹھیک ہے، (عبداللہ دنیا سے بالکل الگ تھلگ ہو چکا تھا) آپ صلی اللہ علیہ وسلم نے اس کے بارے میں پوچھا تو انہوں نے بتایا کہ اس نے اپنے اوپر نیند کو حرام کیا ہوا ہے، وہ سوتا ہی نہیں ہے، نہ ہی وہ روزے میں ناغہ کرتا ہے، وہ گوشت نہیں کھاتا، اپنے گھر والوں کے حقوق پورے نہیں کرتا۔ حضور صلی اللہ علیہ وسلم نے پوچھا: وہ کہاں ہے؟ انہوں نے بتایا کہ ابھی ابھی باہر کہیں نکلے ہیں، یا رسول اللہ صلی اللہ علیہ وسلم وہ واپس آنے ہی والے ہوں گے، رسول اللہ صلی اللہ علیہ وسلم نے فرمایا: جب وہ آ جائے تو اس کو میرے پاس بھیج دینا۔ لیکن ابھی زیادہ دیر نہیں گزری تھی کہ عبداللہ بھی آ گئے، رسول اللہ صلی اللہ علیہ وسلم نے اس کو فرمایا: تیری اپنی جان کا بھی تجھ پر حق ہے اور تیری بیوی کا بھی تجھ پر حق ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7074]