قیس بن سکن اسدی فرماتے ہیں: سیدنا عبداللہ بن مسعود رضی اللہ عنہ ایک خاتون کے پاس گئے، اس نے خسرہ کی وجہ سے تمیمہ پہنا ہوا تھا، آپ نے اس کو بہت سختی کے ساتھ توڑ دیا پھر فرمایا: بے شک عبداللہ کی اولاد شرک سے بے نیاز ہیں۔ اور فرمایا: ہم نے جو باتیں رسول اللہ صلی اللہ علیہ وسلم سے یاد کی ہوئی ہیں ان میں ایک بات یہ بھی ہے کہ ” (شرکیہ دم، تمیمات اور تولیہ (ایسا عمل کرنا جس سے عورت اپنے شوہر کے خلاف بھڑک اٹھے)، شرک میں سے ہے “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7695]

ام المومنین سیدہ عائشہ رضی اللہ عنہا فرماتی ہیں کہ تمیم وہ نہیں ہے جو بیماری کے بعد لٹکایا جائے بلکہ تعویذ وہ ہے جو بیماری سے پہلے لٹکایا جائے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7696]

ام المومنین سیدہ عائشہ رضی اللہ عنہا فرماتی ہیں کہ تمیم وہ نہیں ہے جو بیماری کے بعد لٹکایا جاتا ہے بلکہ تمیم وہ ہے جو بیماری سے پہلے لٹکایا جاتا ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ اور شاید کہ کسی کے دل میں یہ وہم پیدا ہو کہ یہ روایات تو عائشہ رضی اللہ عنہا تک موقوف ہیں۔ تو اس کو یہ وہم نہیں کرنا چاہیے کیونکہ رسول اللہ صلی اللہ علیہ وسلم نے بہت ساری احادیث میں تمیمات کا تذکرہ کیا ہے۔ اور جب ام المومنین نے تمیمہ کی تفسیر بیان کر دی تو وہ حدیث بھی مسند ہی ہو گی۔ [المستدرك على الصحيحين/كِتَابُ الطِّبِّ/حدیث: 7697]