سیدنا ابوسعید خدری رضی اللہ عنہ فرماتے ہیں کہ رسول اللہ صلی اللہ علیہ وسلم سے اونٹوں کی کوہان اور دنبے کی چکتی کاٹنے کے بارے میں پوچھا گیا تو آپ صلی اللہ علیہ وسلم نے فرمایا: زندہ جانور کے جسم سے گوشت کا جو ٹکڑا کاٹ لیا گیا، وہ مردار ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الذَّبَائِحِ/حدیث: 7790]

سیدنا عبداللہ بن مسعود رضی اللہ عنہ فرماتے ہیں: ایک سفر میں، ہم رسول اللہ صلی اللہ علیہ وسلم کے ہمراہ تھے۔ ہمارا گزر ایک درخت کے قریب سے ہوا، اس پر فاختہ کے دو بچے بیٹھے ہوئے تھے۔ ہم نے ان کو پکڑ لیا، فاختہ رسول اللہ صلی اللہ علیہ وسلم کی بارگاہ میں حاضر ہوئی اور اپنی زبان میں بولنے لگی۔ (اس کی بات سن کر) رسول اللہ صلی اللہ علیہ وسلم نے پوچھا: اس فاختہ کے بچے کس نے اٹھا کر اس کو پریشان کیا ہے؟ ہم نے کہا: یا رسول اللہ صلی اللہ علیہ وسلم ہم نے۔ آپ صلی اللہ علیہ وسلم نے فرمایا: وہ بچے وہاں واپس رکھ کر آؤ۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الذَّبَائِحِ/حدیث: 7791]