سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے فرمایا: ”اللہ تعالیٰ کسی بندے کے دل میں اس کے گناہ پر جس قدر ندامت دیکھتا ہے، اسے اس سے مغفرت مانگنے سے پہلے ہی معاف کر دیتا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7838]

سیدنا عبداللہ بن مسعود رضی اللہ عنہ سے اللہ تعالیٰ کے اس فرمان ﴿لَعَلَّهُمْ يَرْجِعُونَ﴾ [سورة السجدة: 21] کے متعلق روایت ہے، انہوں نے کہا: (اس سے مراد ہے کہ) وہ توبہ کریں۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7839]

سیدنا انس بن مالک رضی اللہ عنہ سے روایت ہے کہ ایک شخص نبی کریم صلی اللہ علیہ وسلم کی خدمت میں حاضر ہوا اور عرض کیا: اے اللہ کے رسول صلی اللہ علیہ وسلم ! مجھ سے حد (کا گناہ) سرزد ہو گیا ہے، راوی کہتے ہیں کہ آپ صلی اللہ علیہ وسلم نے اس سے اس کے متعلق کچھ دریافت نہیں فرمایا، پھر نماز قائم کی گئی اور نبی کریم صلی اللہ علیہ وسلم نے نماز پڑھائی، جب آپ صلی اللہ علیہ وسلم نماز سے فارغ ہوئے تو اس نے پھر عرض کیا: اے اللہ کے رسول صلی اللہ علیہ وسلم ! مجھ سے حد والا گناہ ہو گیا ہے، پس مجھ پر اللہ کی کتاب (کی حد) نافذ فرما دیجیے، آپ صلی اللہ علیہ وسلم نے پوچھا: ”کیا تم نے ہمارے ساتھ نماز پڑھی ہے؟“ اس نے کہا: جی ہاں، آپ صلی اللہ علیہ وسلم نے فرمایا: ”تمہیں معاف کر دیا گیا ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7840]