شعبی فرماتے ہیں: سیدنا عمر، سیدنا علی، سیدنا عبداللہ اور سیدنا زید رضی اللہ عنہم سے وراثت کا ایک مسئلہ پوچھا گیا جس میں ایک ماں، شوہر، کچھ عینی بہن بھائی اور کچھ اخیافی بہن بھائی وارث تھے۔ ان سب بزرگوں نے فتویٰ دیا کہ عینی بہن بھائی، اخیافی بہن بھائیوں کے ساتھ ثلث میں شریک ہوں گے، اور اس کی وجہ یہ ہے کہ وہ سب ماں کے بیٹے ہیں، ان کے والد نے ان کے لیے قرب کے سوا کسی چیز میں اضافہ نہیں کیا، اس لیے وہ سب ثلث میں شریک ہوں گے۔ [المستدرك على الصحيحين/كِتَابُ الْفَرَائِضِ/حدیث: 8169]

سیدنا عبداللہ بن عباس رضی اللہ عنہما نے فرمایا: ایک چیز ایسی ہے جو تمہیں نہ کتاب اللہ میں ملے گی، اور نہ رسول اللہ صلی اللہ علیہ وسلم کے کسی فیصلے میں ملے گی لیکن تم دیکھو گے کہ سب لوگ اس کو اپناتے ہیں، وہ یہ کہ آدھا حصہ بیٹی کے لیے اور آدھا حصہ بہن کے لیے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفَرَائِضِ/حدیث: 8170]