ام المومنین سیدہ عائشہ رضی اللہ عنہا فرماتی ہیں: رسول اللہ صلی اللہ علیہ وسلم نے ام المومنین سیدہ ام سلمہ رضی اللہ عنہا کے گھر میں ایک لڑکی دیکھی اس کے چہرے پر چھائیاں اور مہاسے تھے، رسول اللہ صلی اللہ علیہ وسلم نے فرمایا: اس کو نظر لگی ہے، اس کو دم کرواؤ۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الرُّقَى وَالتَّمَائِمِ/حدیث: 8481]

سیدنا جابر بن عبداللہ رضی اللہ عنہما فرماتے ہیں کہ انصار کا عمرو بن حزم نامی شخص سانپ کے کاٹے کا دم کیا کرتا تھا، اس نے کہا: یا رسول اللہ صلی اللہ علیہ وسلم آپ نے تو دم کرنے سے منع فرمایا ہے، جبکہ میں سانپ کے کاٹے کا دم کرتا ہوں، حضور صلی اللہ علیہ وسلم نے فرمایا: تم وہ دم مجھے سناؤ، اس نے حضور صلی اللہ علیہ وسلم کو دم سنایا، حضور صلی اللہ علیہ وسلم نے فرمایا: یہ دم کرنے میں کوئی حرج نہیں ہے، یہ تو عہد ہے۔ انصار میں سے میرے ماموں آئے، وہ بچھو کے کاٹے کا دم کرتے تھے، انہوں نے کہا: یا سول اللہ صلی اللہ علیہ وسلم آپ نے دم کرنے سے منع فرمایا ہے جب کہ میں تو بچھو کے کاٹے کا دم کرتا ہوں، حضور صلی اللہ علیہ وسلم نے فرمایا: جو شخص اپنے مسلمان بھائی کو جس قدر فائدہ پہنچا سکتا ہو، وہ پہنچائے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الرُّقَى وَالتَّمَائِمِ/حدیث: 8482]

سیدنا عبداللہ بن مسعود رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: حج کے مقام پر ساری امتیں میرے سامنے پیش کی گئیں، میں نے سب کو دیکھا، ان کی کثرت اور ہیبت مجھے اچھی لگی، ان سے میدان اور پہاڑ سب بھرے ہوئے تھے، مجھ سے کہا گیا: اے محمد! کیا تم راضی ہو؟ میں نے کہا: جی اے میرے رب میں راضی ہوں، اللہ تعالیٰ نے فرمایا: ان تمام کے ساتھ ساتھ مزید ستر ہزار لوگ بغیر حساب کے جنت میں جائیں گے، یہ وہ لوگ ہوں گے جو نہ تو (جادو والا) دم کرواتے ہیں، اور نہ (زخم ٹھیک کروانے کے لئے آگ سے) داغ لگواتے ہیں، اور وہ اپنے رب پر توکل کرتے ہیں۔ سیدنا عکاشہ بن محصن نے کہا: یا رسول اللہ صلی اللہ علیہ وسلم آپ دعا فرمائیں کہ اللہ تعالیٰ مجھے ان میں سے كر دے، حضور صلی اللہ علیہ وسلم نے ان کے لئے دعا فرما دی۔ پھر ایک اور آدمی اٹھ کر کھڑا ہوا اور کہنے لگا: یا رسول اللہ صلی اللہ علیہ وسلم میرے لئے بھی دعا فرمایئے کہ اللہ تعالیٰ مجھے ان میں سے کر دے۔ نبی اکرم صلی اللہ علیہ وسلم نے فرمایا: عکاشہ تم سے آگے نکل گیا ہے۔ ٭٭ یہ حدیث متعدد وجوہ سے صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور اس حدیث میں دم کروانے سے ممانعت نہیں ہے، بلکہ اس میں یہ ہے کہ ”اور نہ ہی یہ ہے کہ توکل، دم کے منافی ہے “ اور اس پر دلیل درج ذیل حدیث ہے۔ [المستدرك على الصحيحين/كِتَابُ الرُّقَى وَالتَّمَائِمِ/حدیث: 8483]

سیدنا مغیرہ بن شعبہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جس نے دم کروایا یا، داغ لگوایا، اس نے توکل نہیں کیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرُّقَى وَالتَّمَائِمِ/حدیث: 8484]

سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: جس نے شام کے وقت تین مرتبہ یہ دعا پڑھی اعوذ بكلمات اللہ التامات من شر ما خلق اس کو اس رات سانپ کچھ نقصان نہیں دے گا، آپ فرماتے ہیں: جب حضور صلی اللہ علیہ وسلم کے گھر والوں میں سے کسی کو سانپ کاٹتا تو آپ یہی دعا پڑھ کر دم کرتے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو اس اسناد کے ہمراہ نقل نہیں کیا۔ [المستدرك على الصحيحين/كِتَابُ الرُّقَى وَالتَّمَائِمِ/حدیث: 8485]