سیدہ ام عطیہ رضی اللہ عنہا سے روایت ہے، انہوں نے کہا: ”بے شک رسول اللہ صلی اللہ علیہ وسلم نے ہمیں نوحہ کرنے سے منع فرمایا ہے۔“ [سنن ابي داود/كِتَاب الْجَنَائِزِ/حدیث: 3127]

سیدنا ابو سعید خدری رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے ”نوحہ کرنے والی اور اسے سننے والی پر لعنت فرمائی ہے۔“ [سنن ابي داود/كِتَاب الْجَنَائِزِ/حدیث: 3128]

سیدنا عبداللہ بن عمر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بلاشبہ میت کو اس کے گھر والوں کے رونے کی وجہ سے عذاب ہوتا ہے۔“ یہ حدیث سیدہ عائشہ رضی اللہ عنہا کے سامنے بیان کی گئی، تو انہوں نے کہا: (سیدنا ابن عمر رضی اللہ عنہ بھول گئے ہیں، حقیقت یہ ہے کہ) نبی کریم صلی اللہ علیہ وسلم ایک قبر کے پاس سے گزرے تھے، تو فرمایا تھا: ”بیشک یہ قبر والا عذاب دیا جا رہا ہے اور اس کے گھر والے اس پر رو رہے ہیں۔“ پھر سیدہ عائشہ رضی اللہ عنہا نے یہ آیت پڑھی ﴿وَلَا تَزِرُ وَازِرَةٌ وِزْرَ أُخْرَى﴾ [سورة الأنعام: 164] ”کوئی جان کسی دوسری جان کا بوجھ نہیں اٹھائے گی۔“ ہناد نے ابومعاویہ سے روایت کرتے ہوئے وضاحت کی کہ رسول اللہ صلی اللہ علیہ وسلم ایک یہودی کی قبر کے پاس سے گزرے تھے۔ [سنن ابي داود/كِتَاب الْجَنَائِزِ/حدیث: 3129]

سیدنا یزید بن اوس کہتے ہیں کہ میں سیدنا ابوموسیٰ اشعری رضی اللہ عنہ کے ہاں گیا جب کہ وہ (بیماری کے باعث) بہت ہی تکلیف میں تھے، تو ان کی بیوی رونے لگی یا اس کی تیاری کرنے لگی۔ سیدنا ابوموسیٰ رضی اللہ عنہ نے اس سے کہا: ”کیا تو نے رسول اللہ صلی اللہ علیہ وسلم کا فرمان نہیں سنا؟“ کہنے لگی: ”ہاں، میں نے سنا ہے۔“ چنانچہ وہ خاموش ہو رہی۔ جب سیدنا ابوموسیٰ رضی اللہ عنہ کی وفات ہو گئی تو یزید کہتے ہیں کہ میں اس خاتون سے ملا اور اس سے پوچھا کہ ”وہ کیا بات تھی جو ابوموسیٰ رضی اللہ عنہ نے آپ سے کہی تھی کہ کیا تم نے رسول اللہ صلی اللہ علیہ وسلم کا فرمان نہیں سنا اور پھر آپ خاموش ہو رہی تھیں؟“ انہوں نے کہا: ”رسول اللہ صلی اللہ علیہ وسلم نے فرمایا تھا: ”جو کوئی (مصیبت میں) بال مونڈے یا بین کرے (یا منہ پیٹے) یا کپڑے پھاڑے وہ ہم میں سے نہیں ہے۔““ [سنن ابي داود/كِتَاب الْجَنَائِزِ/حدیث: 3130]

سیدنا اسید بن ابی اسید رحمہ اللہ ایک خاتون رضی اللہ عنہا سے بیان کرتے ہیں جس نے رسول اللہ صلی اللہ علیہ وسلم سے بیعت کی تھی، وہ کہتی ہیں کہ رسول اللہ صلی اللہ علیہ وسلم نے ہم سے جو عہد لیے تھے کہ ﴿نیکی کے کاموں میں ہم آپ صلی اللہ علیہ وسلم کی نافرمانی نہیں کریں گی﴾ [سورة الممتحنة: 12] ، اس میں یہ بھی تھا کہ ”چہرہ نہیں نوچیں گی، ہائے وائے نہیں کریں گی، کپڑے نہیں پھاڑیں گی اور بال نہیں نوچیں گی۔“ [سنن ابي داود/كِتَاب الْجَنَائِزِ/حدیث: 3131]