حضرت انس بن مالک رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم کے سامنے جب بھی کوئی ایسا مقدمہ پیش کیا گیا جس میں قصاص ہوتا تو رسول اللہ صلی اللہ علیہ وسلم نے معاف کرنے کا حکم دیا۔“ [سنن ابن ماجه/كتاب الديات/حدیث: 2692]

حضرت ابودرداء رضی اللہ عنہ سے روایت ہے، انہوں نے فرمایا: ”میں نے رسول اللہ صلی اللہ علیہ وسلم کو فرماتے ہوئے سنا، آپ صلی اللہ علیہ وسلم فرما رہے تھے: ”جس کو جسم میں کوئی تکلیف پہنچے، پھر وہ اس (تکلیف پہنچانے والے) کو معاف کر دے تو اللہ تعالیٰ اس کی وجہ سے اس کا درجہ بلند کرتا ہے اور اس کا گناہ معاف کرتا ہے۔““ حضرت ابودرداء رضی اللہ عنہ نے فرمایا: ”یہ بات میرے کانوں نے سنی اور میرے دل نے اسے یاد رکھا۔“ [سنن ابن ماجه/كتاب الديات/حدیث: 2693]