حضرت حسن فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: بیشک اللہ تعالیٰ نرم برتاؤ کرنے والے ہیں اور نرمی کو پسند فرماتے ہیں اور نرمی کی صورت میں وہ کچھ دیتے ہیں جو سختی کی صور ت میں عطا نہیں فرماتے۔ [مصنف ابن ابي شيبه/ كتاب الأدب/حدیث: 26954]

حضرت اسامہ بن شریک فرماتے ہیں کہ ایک آدمی نے پوچھا! اے اللہ کے رسول (صلی اللہ علیہ وآلہ وسلم)! ایک بندے کو سب سے بہترین چیز کیا دی گئی ہے؟ آپ صلی اللہ علیہ وآلہ وسلم نے فرمایا: ”اچھا اخلاق۔“ [مصنف ابن ابي شيبه/ كتاب الأدب/حدیث: 26955]

حضرت اسامہ بن شریک فرماتے ہیں کہ لوگوں نے پوچھا: اے اللہ کے رسول (صلی اللہ علیہ وآلہ وسلم)! مسلمان کو سب سے افضل چیز کیا مرحمت کی گئی ہے؟ آپ صلی اللہ علیہ وآلہ وسلم نے فرمایا: اچھا اخلاق۔ [مصنف ابن ابي شيبه/ كتاب الأدب/حدیث: 26956]

حضرت جابر بن سمرہ فرماتے ہیں کہ میں ایسی مجلس میں تھا جس میں نبی کریم صلی اللہ علیہ وآلہ وسلم بھی موجود تھے۔ اور حضرت ابو سمرہ میرے آگے بیٹھے ہوئے تھے۔ پس رسول اللہ صلی اللہ علیہ وآلہ وسلم نے ارشاد فرمایا: بیشک بداخلاقی اور بدکلامی دونوں کا اسلام میں کوئی حصہ بھی نہیں، اور لوگوں میں بہترین اسلام والا وہ شخص ہے جو ان میں اچھے اخلاق والا ہے۔ [مصنف ابن ابي شيبه/ كتاب الأدب/حدیث: 26957]

حضرت مسروق فرماتے ہیں کہ حضرت عبد اللہ بن عمرو رضی اللہ عنہ نے ارشاد فرمایا: رسول اللہ صلی اللہ علیہ وآلہ وسلم نہ تو بدخلق تھے اور نہ ہی بدکلامی کرنے والے تھے۔ اور فرمایا کرتے تھے: بیشک تم میں سے بہترین لوگ وہ ہیں جو اچھے اخلاق والے ہیں۔ [مصنف ابن ابي شيبه/ كتاب الأدب/حدیث: 26958]

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: لوگوں میں کامل ترین ایمان والے، اور مؤمنین میں افضل ایمان والے وہ لوگ ہیں جو ان میں سب سے اچھے اخلاق والے ہیں۔ اور تم میں سب سے بہترین وہ لوگ ہیں جو اپنی بیویوں کے لیے اچھے ہیں۔ [مصنف ابن ابي شيبه/ كتاب الأدب/حدیث: 26959]

حضرت عائشہ رضی اللہ عنہا فرماتی ہیں کہ رسول اللہ صلی اللہ علیہ وآلہ وسلم نے ارشاد فرمایا: مومنین میں کامل ترین ایمان والاوہ شخص ہے جو ان سب میں سب سے اچھے اخلاق والا ہو اور اپنے گھر والوں پر سب سے زیادہ مہربان ہو۔ [مصنف ابن ابي شيبه/ كتاب الأدب/حدیث: 26960]

حضرت ابو ثعلبہ الخشنی فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: بیشک قیامت کے دن میرے سب سے زیادہ قریب اور سب سے زیادہ محبوب وہ شخص ہوگا جو تم میں سے سب سے زیادہ اچھے اخلاق والا ہوگا۔ اور بیشک مجھ سے دور اور سب سے زیادہ مبغوضی وہ شخص ہوگا جو تم میں برے اخلاق والا، بکواس کرنے والا، فحش کلام کرنے والا، اور تکبر کرنے والا ہوگا۔ [مصنف ابن ابي شيبه/ كتاب الأدب/حدیث: 26961]

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: مومنین میں کامل ترین ایمان والے وہ لوگ ہیں جو ان میں اچھے اخلاق والے ہیں۔ [مصنف ابن ابي شيبه/ كتاب الأدب/حدیث: 26962]

حضرت حارثہ بن وہب فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: بد خلق اور بدکلام جنت میں داخل نہیں ہوگا۔ جو اظّ سے مراد، بدخو بد کردار ہے۔ [مصنف ابن ابي شيبه/ كتاب الأدب/حدیث: 26963]