سیدنا عبداللہ بن عمر رضی اللہ عنہما بیان کرتے ہیں: جب نبی کریم صلی اللہ علیہ وسلم مکہ میں داخل ہوئے، تو آپ صلی اللہ علیہ وسلم نے حجر اسود اور رکن یمانی کا استلام کیا، آپ صلی اللہ علیہ وسلم نے ان دونوں کے علاوہ کسی رکن کا استلام نہیں کیا۔ [سنن الدارقطني/ كتاب الحج/حدیث: 2581]

منصور بن عبدالرحمن اپنی والدہ صفیہ کا یہ بیان نقل کرتے ہیں: بنو عبدالدار سے تعلق رکھنے والی کچھ خواتین نے یہ بات بتائی ہے، جنہیں نبی کریم صلی اللہ علیہ وسلم کا زمانہ نصیب ہوا، انہوں نے بتایا: ہم لوگ ابن ابی حصین کے گھر میں داخل ہوئے، ہم نے دروازے سے جھانک کر دیکھا، تو ہم نے نبی کریم صلی اللہ علیہ وسلم کو دیکھا کہ آپ صلی اللہ علیہ وسلم سعی کرنے کی جگہ پر دوڑ رہے تھے، یہاں تک کہ آپ صلی اللہ علیہ وسلم زقاق بنو فلان تک پہنچے، یہ ایک جگہ ہے، جس کا نام سعی کرنے کی جگہ میں لیا جاتا ہے، پھر نبی کریم صلی اللہ علیہ وسلم نے لوگوں کی طرف رخ کیا اور ارشاد فرمایا: ”اے لوگو! سعی کرو، کیونکہ سعی کرنا تم پر لازم قرار دیا گیا ہے۔“ [سنن الدارقطني/ كتاب الحج/حدیث: 2582]

سیدنا برہ بنت ابوتجرات رضی اللہ عنہا بیان کرتی ہیں: میں نے نبی کریم صلی اللہ علیہ وسلم کو دیکھا، جب آپ صلی اللہ علیہ وسلم سعی کرنے کی جگہ کے آخری حصے کی طرف پہنچے، تو آپ صلی اللہ علیہ وسلم نے ارشاد فرمایا: ”تم لوگ سعی کرو، کیونکہ اللہ تعالیٰ نے تم پر سعی لازم قرار دی ہے۔“ (وہ خاتون بیان کرتی ہیں) میں نے نبی کریم صلی اللہ علیہ وسلم کو سعی کرتے ہوئے دیکھا، یہاں تک کہ آپ صلی اللہ علیہ وسلم کے تہبند کے ہٹنے سے آپ صلی اللہ علیہ وسلم کی پنڈلیاں نظر آ رہی تھیں۔ [سنن الدارقطني/ كتاب الحج/حدیث: 2583]

سیدہ حبیبہ بنت ابوتجرات رضی اللہ عنہا بیان کرتی ہیں: میں نے نبی کریم صلی اللہ علیہ وسلم کو صفا و مروہ کے درمیان سعی کرتے ہوئے دیکھا ہے، آپ صلی اللہ علیہ وسلم نے ارشاد فرمایا: ”تم لوگ سعی کرو، کیونکہ اللہ تعالیٰ نے تم پر سعی کرنا لازم قرار دیا ہے۔“ [سنن الدارقطني/ كتاب الحج/حدیث: 2584]

صفیہ نامی خاتون، ابوتجرات کی صاحبزادی کا یہ بیان نقل کرتی ہیں: میں آل ابوحصین کے گھر میں قریش کی کچھ خواتین کے ساتھ داخل ہوئی، میں نے نبی کریم صلی اللہ علیہ وسلم کو دیکھا کہ آپ صفا اور مروہ کے درمیان سعی کر رہے تھے، میں نے آپ صلی اللہ علیہ وسلم کو سعی کرتے ہوئے دیکھا، آپ کے تیز دوڑنے کی وجہ سے آپ صلی اللہ علیہ وسلم کا تہبند ادھر ادھر ہل رہا تھا، یہاں تک کہ میں یہ کہہ سکتی ہوں کہ میں نے آپ صلی اللہ علیہ وسلم کی دونوں پنڈلیوں کو دیکھ لیا، میں نے آپ صلی اللہ علیہ وسلم کو یہ ارشاد فرماتے ہوئے سنا: ”تم لوگ سعی کرو، کیونکہ اللہ تعالیٰ نے تم پر سعی کرنا لازم قرار دیا ہے۔“ [سنن الدارقطني/ كتاب الحج/حدیث: 2585]

صفیہ بنت شیبہ، بنو عبدالدار سے تعلق رکھنے والی ایک خاتون، جو ابوتجرات کی صاحبزادی ہیں، ان کے حوالے سے یہ بات نقل کرتی ہیں، وہ بیان کرتی ہیں: میں آل ابوحصین کے گھر میں قریش کی کچھ خواتین کے ساتھ داخل ہوئی، تو ہم نے نبی کریم صلی اللہ علیہ وسلم کو دیکھا (اس کے بعد اس خاتون نے حسب سابق حدیث ذکر کی ہے)۔ [سنن الدارقطني/ كتاب الحج/حدیث: 2586]

صفیہ بنت شیبہ بیان کرتی ہیں: میں اپنی کھڑکی میں کھڑی ہوئی تھی، میں نے نبی کریم صلی اللہ علیہ وسلم کو صفا اور مروہ کے درمیان دیکھا، میں نے آپ صلی اللہ علیہ وسلم کو دیکھا کہ جب آپ صلی اللہ علیہ وسلم نشیب میں تشریف لائے، تو دوڑ پڑے۔ [سنن الدارقطني/ كتاب الحج/حدیث: 2587]

نافع، سیدنا عبداللہ بن عمر رضی اللہ عنہما کا گنجے شخص کے بارے میں یہ فرمان نقل کرتے ہیں: اس کے سر پر استرا پھر جائے گا۔ [سنن الدارقطني/ كتاب الحج/حدیث: 2588]

نافع بیان کرتے ہیں: سیدنا عبداللہ بن عمر رضی اللہ عنہما نے گنجے شخص کے بارے میں یہ بات فرمائی ہے: اس کے سر پر استرا پھیرا جائے گا۔ عبدالکریم نامی راوی نے یہ بات نقل کی ہے، میری تحریر میں یہ بات موجود ہے، ایک مرتبہ راوی نے اسے مرفوع حدیث کے طور پر نقل کیا ہے اور ایک مرتبہ مرفوع حدیث کے طور پر نقل نہیں کیا ہے۔ [سنن الدارقطني/ كتاب الحج/حدیث: 2589]

یہی روایت ایک اور سند کے ہمراہ سیدنا عبداللہ بن عمر رضی اللہ عنہما کے حوالے سے موقوف روایت کے طور پر منقول ہے۔ [سنن الدارقطني/ كتاب الحج/حدیث: 2590]