عبداللہ بن بریدہ اپنے والد (بریدہ رضی اللہ عنہ) سے روایت کرتے ہیں کہ ایک مرتبہ نبی اکرم صلی اللہ علیہ وسلم خطبہ دے رہے تھے کہ اسی دوران سیدنا امام حسن اور سیدنا امام حسین رضی اللہ عنہما (جو بچے تھے) آئے، انہوں نے سرخ قمیصیں پہنی ہوئی تھیں، وہ کبھی گر پڑتے تھے اور کبھی کھڑے ہو جاتے تھے، نبی اکرم صلی اللہ علیہ وسلم ان دونوں کے لیے منبر سے نیچے تشریف لے آئے، آپ صلی اللہ علیہ وسلم نے ان دونوں کو پکڑ لیا اور ارشاد فرمایا: (ارشادِ باری تعالیٰ ہے) ” ﴿إِنَّمَا أَمْوَالُكُمْ وَأَوْلَادُكُمْ فِتْنَةٌ﴾ [سورة التغابن: 15] ”بے شک تمہارے مال اور تمہاری اولاد آزمائش ہیں۔“” [صحیح ابن حبان/كتاب الفرائض/حدیث: 6038]

سیدنا ابو بریدہ رضی اللہ عنہ بیان کرتے ہیں کہ نبی اکرم صلی اللہ علیہ وسلم ہمیں خطبہ دے رہے تھے، اسی دوران سیدنا امام حسن اور سیدنا امام حسین رضی اللہ عنہما (جو بچے تھے) وہ آ گئے، انہوں نے سرخ قمیصیں پہنی ہوئی تھیں، وہ چلتے تھے اور چلتے ہوئے گر پڑتے تھے، نبی اکرم صلی اللہ علیہ وسلم منبر سے نیچے اتر آئے، آپ صلی اللہ علیہ وسلم نے ان دونوں کو اٹھایا اور اپنے آگے بٹھا لیا، آپ صلی اللہ علیہ وسلم نے فرمایا: ”اللہ تعالیٰ نے سچ فرمایا ہے: ﴿إِنَّمَا أَمْوَالُكُمْ وَأَوْلَادُكُمْ فِتْنَةٌ﴾ [سورة التغابن: 15] ”بے شک تمہارے اموال اور تمہاری اولاد آزمائش ہے۔“ میں نے ان دو بچوں کو دیکھا کہ یہ چلتے ہوئے آ رہے ہیں اور گر پڑتے ہیں، تو مجھ سے صبر نہیں ہوا، یہاں تک کہ میں نے اپنی گفتگو منقطع کر کے انہیں اٹھا لیا۔“ [صحیح ابن حبان/كتاب الفرائض/حدیث: 6039]