سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”مال ذوی الفروض کو دو، ذوی الفروض میں سے جو بچ جائے وہ قریبی مرد رشتے دار کو ملے گا۔“ [صحیح ابن حبان/كتاب الفرائض/حدیث: 6028]

سیدنا عبداللہ بن عباس رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”مال ذوی الفروض کو دو، ذوی الفروض میں سے جو بچ جائے وہ قریبی مرد رشتہ دار کو ملے گا۔“ [صحیح ابن حبان/كتاب الفرائض/حدیث: 6029]

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”مال ذوی الفروض کو دو، ذوی الفروض میں سے جو بچ جائے وہ قریبی مرد رشتہ دار کو ملے گا۔“ [صحیح ابن حبان/كتاب الفرائض/حدیث: 6030]

قبیصہ بن ذویب بیان کرتے ہیں: ایک دادی سیدنا ابوبکر صدیق رضی اللہ عنہ کی خدمت میں حاضر ہوئی اور اس نے اپنی وراثت کا مطالبہ کیا، سیدنا ابوبکر صدیق رضی اللہ عنہ نے فرمایا: تمہارے بارے میں اللہ کی کتاب میں کوئی چیز نہیں ہے اور اللہ کے رسول صلی اللہ علیہ وسلم کی سنت میں بھی تمہارے بارے میں مجھے کسی چیز کا علم نہیں ہے، تم واپس چلی جاؤ میں لوگوں سے اس بارے میں دریافت کرتا ہوں۔ سیدنا ابوبکر رضی اللہ عنہ نے لوگوں سے اس بارے میں دریافت کیا، تو سیدنا مغیرہ بن شعبہ رضی اللہ عنہ نے بتایا: میں اس وقت نبی اکرم صلی اللہ علیہ وسلم کے پاس موجود تھا، جب آپ صلی اللہ علیہ وسلم نے اسے (یعنی دادی یا نانی کو) چھٹا حصہ دیا تھا۔ سیدنا ابوبکر رضی اللہ عنہ نے دریافت کیا: تمہارے ساتھ کوئی اور شخص بھی تھا؟ سیدنا محمد بن مسلمہ انصاری رضی اللہ عنہ کھڑے ہوئے اور انہوں نے بھی وہی بات بیان کی جو سیدنا مغیرہ رضی اللہ عنہ نے بیان کی تھی، تو سیدنا ابوبکر رضی اللہ عنہ نے اس (دادی یا نانی) کے لیے چھٹے حصے کو لازم قرار دیا۔ پھر ایک اور دادی (یا نانی) سیدنا عمر بن خطاب رضی اللہ عنہ کے پاس (ان کے عہد خلافت میں) آئی اور اپنی وراثت کا مطالبہ کیا، تو سیدنا عمر رضی اللہ عنہ نے فرمایا: تمہارے لیے اللہ کی کتاب میں کوئی حکم نہیں ہے، تمہارے بارے میں صرف ایک فیصلہ ہے، میں ذوی الفروض میں اضافہ نہیں کرنا چاہتا، یہ چھٹا حصہ ہے، اگر تم دونوں (یعنی دادی اور نانی) اس میں اکٹھی ہو، تو یہ تم دونوں کے درمیان تقسیم ہو گا اور اگر تم دونوں میں سے کوئی ایک ہو، تو یہ اسے ملے گا۔ [صحیح ابن حبان/كتاب الفرائض/حدیث: 6031]

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب بچہ (پیدائش کے وقت) چیخ کر روئے، تو اس کی نماز جنازہ بھی ادا کی جائے گی اور اس کی وراثت کے احکام بھی جاری ہوں گے۔“ [صحیح ابن حبان/كتاب الفرائض/حدیث: 6032]

سیدنا اسامہ بن زید رضی اللہ عنہما بیان کرتے ہیں کہ انہیں نبی اکرم صلی اللہ علیہ وسلم کی اس حدیث کا پتا چلا ہے، آپ صلی اللہ علیہ وسلم نے ارشاد فرمایا ہے: ”کوئی مسلمان کسی کافر کا وارث نہیں بنے گا اور کوئی کافر کسی مسلمان کا وارث نہیں بنے گا۔“ [صحیح ابن حبان/كتاب الفرائض/حدیث: 6033]

سیدنا عبداللہ رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں کہ جب (میت کے ورثاء میں) ایک بیٹی، ایک پوتی اور ایک بہن ہو تو نبی اکرم صلی اللہ علیہ وسلم نے یہ فرمایا ہے: ”بیٹی کو نصف ملے گا، پوتی کو چھٹا حصہ ملے گا، جو باقی بچے گا وہ بہن کو ملے گا۔“ [صحیح ابن حبان/كتاب الفرائض/حدیث: 6034]

سیدنا مقدام رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص بوجھ چھوڑ کر جاتا ہے وہ ہماری طرف آئے گا اور جو شخص مال چھوڑ کر جاتا ہے وہ اس کے ورثاء کو ملے گا، میں اس کا وارث ہوں جس کا کوئی وارث نہیں ہے، میں اس کی طرف سے دیت کی ادائیگی کروں گا اور میں اس کا وارث بھی بنوں گا، اور جس شخص کا کوئی وارث نہ ہو ماموں اس کا وارث بنتا ہے، وہ اس کی طرف سے دیت کی ادائیگی بھی کرے گا اور اس کا وارث بھی بنے گا۔“ [صحیح ابن حبان/كتاب الفرائض/حدیث: 6035]

سیدنا مقدام رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص قرض یا بال بچے چھوڑ کر جاتا ہے، تو وہ ہماری طرف آئیں گے، اور جو مال چھوڑ کر جاتا ہے وہ اس کے ورثاء کو ملے گا، جس کا کوئی مولیٰ نہ ہو، میں اس کا مولیٰ ہوں، میں اس کی طرف سے فدیہ بھی ادا کروں گا، اس کے مال کا وارث بھی بنوں گا، اور جس کا کوئی مولیٰ نہ ہو، اس کا ماموں مولیٰ ہوتا ہے، وہ اس کی طرف سے فدیہ بھی ادا کرے گا، اس کے مال کا وارث بھی بنے گا۔“ (امام ابن حبان رحمہ اللہ فرماتے ہیں:) یہ روایت راشد بن سعد نے ابوعامر کے حوالے سے سیدنا مقدام رضی اللہ عنہ سے سنی ہے اور انہوں نے یہ روایت عبدالرحمن کے حوالے سے سیدنا مقدام رضی اللہ عنہ سے بھی سنی ہے اور اس کے دونوں طرق محفوظ ہیں، البتہ ان دونوں روایات کا متن ایک دوسرے سے مختلف ہے۔ [صحیح ابن حبان/كتاب الفرائض/حدیث: 6036]

سیدنا ابوامامہ بن سہل رضی اللہ عنہ بیان کرتے ہیں کہ سیدنا عمر رضی اللہ عنہ نے سیدنا ابوعبیدہ رضی اللہ عنہ کو خط لکھا کہ اپنے بچوں کو «العَوْمَ» (تیراکی) اور اپنے جنگجو افراد کو تیر اندازی سکھاؤ۔ راوی بیان کرتے ہیں کہ وہ لوگ مختلف مقامات پر اس کی مشق کر رہے تھے، اسی دوران ایک اندھا تیر آیا اور ایک لڑکے کو لگا، وہ لڑکا مر گیا۔ اس لڑکے کے رشتے داروں میں سے صرف اس کے ماموں کا پتا چلا۔ سیدنا ابوعبیدہ رضی اللہ عنہ نے سیدنا عمر رضی اللہ عنہ کو خط لکھا اور لڑکے کا معاملہ بیان کیا کہ اس کی دیت کس کے سپرد کی جائے؟ سیدنا عمر رضی اللہ عنہ نے انہیں خط لکھا کہ نبی اکرم صلی اللہ علیہ وسلم نے یہ بات ارشاد فرمائی ہے: ”جس کا کوئی مولیٰ نہ ہو، اللہ اور اس کے رسول اس کے مولیٰ ہوتے ہیں اور جس کا کوئی وارث نہ ہو، ماموں اس کا وارث ہوتا ہے۔“ [صحیح ابن حبان/كتاب الفرائض/حدیث: 6037]