سیدنا عبداللہ بن مسعود رضی اللہ عنہ سے روایت ہے رسول اللہ صلی اللہ علیہ وسلم نے فرمایا: ”جسے انتہائی شدید حاجت آ پڑے اور اس نے اسے لوگوں پر پیش کر دیا تو اس کی وہ حاجت دور نہ ہو گی، اور جس نے اسے اللہ پر پیش کیا تو عنقریب اللہ تعالیٰ اسے بے پروا کر دے گا، یا تو جلد ہی موت آ جائے گی (اور دنیا کے بکھیڑوں سے جان چھوٹ جائے گی) یا جلد ہی غنی ہو جائے گا (اور کسی کی احتیاج نہ رہے گی)۔“ [سنن ابي داود/كتاب الزكاة /حدیث: 1645]

ابن الفراسی رحمہ اللہ سے روایت ہے کہ فراسی رضی اللہ عنہ نے رسول اللہ صلی اللہ علیہ وسلم سے کہا: ”اے اللہ کے رسول! کیا میں سوال کر لیا کروں؟“ تو نبی کریم صلی اللہ علیہ وسلم نے فرمایا: ”نہیں، اگر ضرور ہی مانگنا ہو تو صالح اور نیک بندوں سے سوال کر لیا کرو۔“ [سنن ابي داود/كتاب الزكاة /حدیث: 1646]

سیدنا ابن ساعدی رضی اللہ عنہ بیان کرتے ہیں کہ سیدنا عمر بن خطاب رضی اللہ عنہ نے مجھے صدقات کا تحصیلدار بنا کر بھیجا، جب میں اس کام سے فارغ ہو کر آیا اور جمع ہونے والے صدقات ان کو پیش کیے تو انہوں نے میرے بارے میں حکم دیا کہ اسے اس کا حق الخدمت دیا جائے، میں نے کہا: ”(نہیں) میں نے یہ کام اللہ کے لیے کیا ہے اور میرا اجر اللہ پر ہے۔“ انہوں نے فرمایا: ”جو تمہیں دیا جا رہا ہے وہ لے لو، میں نے بھی رسول اللہ صلی اللہ علیہ وسلم کے زمانے میں (اسی قسم کا) کام کیا تھا، تو آپ نے مجھے اس کا حق الخدمت دیا تھا، میں نے بھی تمہاری طرح کا جواب دیا تھا، تو رسول اللہ صلی اللہ علیہ وسلم نے مجھ سے فرمایا تھا: ”جب تمہیں کوئی چیز بن مانگے دی جائے تو (لے لو اور) کھاؤ اور صدقہ کرو۔“” [سنن ابي داود/كتاب الزكاة /حدیث: 1647]

سیدنا عبداللہ بن عمر رضی اللہ عنہ سے مروی ہے کہ رسول اللہ صلی اللہ علیہ وسلم نے برسرِ منبر فرمایا جبکہ آپ صلی اللہ علیہ وسلم صدقہ اور اس سے بچنے (کی فضیلت) اور سوال کرنے (کی مذمت) بیان کر رہے تھے، آپ صلی اللہ علیہ وسلم نے فرمایا: ”اوپر والا ہاتھ، نیچے والے ہاتھ سے بہتر ہے۔ اوپر والا ہاتھ خرچ کرنے والا ہوتا ہے اور نیچے والا ہاتھ سوالی۔“ امام ابوداؤد رحمہ اللہ فرماتے ہیں کہ اس روایت میں ایوب پر، جو نافع سے روایت کرتے ہیں، اختلاف کیا گیا ہے۔ عبدالوارث نے کہا: اوپر والے ہاتھ سے مراد «الْمُتَعَفِّفَةُ» ہے یعنی ”جو سوال نہ کرے۔“ جبکہ بواسطہ حماد بن زید، ایوب سے روایت کرنے والے اکثر حضرات اوپر والے ہاتھ سے مراد «الْمُنْفِقَةُ» یعنی ”خرچ کرنے والا“ بیان کرتے ہیں۔ حماد سے صرف ایک راوی (مسدد بن مسرہد) نے «الْمُتَعَفِّفَةُ» ذکر کیا ہے۔ [سنن ابي داود/كتاب الزكاة /حدیث: 1648]

سیدنا مالک بن نضلہ رضی اللہ عنہ سے روایت ہے رسول اللہ صلی اللہ علیہ وسلم نے فرمایا: ”ہاتھ تین طرح کے ہیں: ایک ہاتھ اللہ کا ہے جو سب سے اوپر ہے، دوسرا دینے والے کا ہے جو اس کے بعد ہے اور سائل کا ہاتھ سب سے نیچے ہے، لہٰذا جو زائد ہو وہ دے دو اور اپنے نفس کے سامنے عاجز مت بنو (اس کا کہا مت مانو)۔“ [سنن ابي داود/كتاب الزكاة /حدیث: 1649]

ابن ابی رافع سیدنا ابورافع رضی اللہ عنہ سے روایت کرتے ہیں کہ نبی کریم صلی اللہ علیہ وسلم نے بنی مخزوم کے ایک شخص کو صدقات کے لیے مقرر کیا، اس نے ابورافع رضی اللہ عنہ سے کہا: ”میرے ساتھ چلو، تمہیں بھی اس سے حصہ ملے گا۔“ انہوں نے کہا: ”پہلے میں نبی کریم صلی اللہ علیہ وسلم کے پاس سے ہو آؤں اور آپ صلی اللہ علیہ وسلم سے پوچھ لوں۔“ چنانچہ وہ آپ صلی اللہ علیہ وسلم کی خدمت میں آئے اور آپ صلی اللہ علیہ وسلم سے پوچھا، تو آپ صلی اللہ علیہ وسلم نے فرمایا: ”قوم کا مولیٰ (آزاد شدہ غلام) انہی میں سے ہوتا ہے اور ہمارے لیے صدقہ حلال نہیں ہے۔“ [سنن ابي داود/كتاب الزكاة /حدیث: 1650]

سیدنا انس رضی اللہ عنہ سے منقول ہے کہ نبی کریم صلی اللہ علیہ وسلم کسی گری پڑی کھجور کے پاس سے گزرتے تو ”اس کو اٹھا لینے سے صرف اس لیے گریز کرتے کہ کہیں صدقے کی نہ ہو۔“ [سنن ابي داود/كتاب الزكاة /حدیث: 1651]

سیدنا انس رضی اللہ عنہ سے مروی ہے کہ نبی کریم صلی اللہ علیہ وسلم نے (کسی راستے میں) ایک کھجور پائی، تو فرمایا: ”اگر مجھے یہ اندیشہ نہ ہوتا کہ یہ صدقے کی ہو گی تو میں اسے کھا لیتا۔“ امام ابوداؤد رحمہ اللہ کہتے ہیں کہ ”اسے ہشام نے قتادہ سے اسی طرح روایت کیا ہے۔“ [سنن ابي داود/كتاب الزكاة /حدیث: 1652]

سیدنا ابن عباس رضی اللہ عنہما بیان کرتے ہیں کہ ”میرے والد نے مجھے نبی کریم صلی اللہ علیہ وسلم کی خدمت میں بھیجا، ان اونٹوں کے سلسلے میں جو آپ صلی اللہ علیہ وسلم نے انہیں صدقہ سے دیے تھے۔“ [سنن ابي داود/كتاب الزكاة /حدیث: 1653]

سیدنا ابن عباس رضی اللہ عنہما سے مذکورہ بالا کی مانند مروی ہے، (ابوعبیدہ نے) یہ اضافہ کیا کہ ”میرے والد نے مجھے بھیجا کہ آپ ان اونٹوں کو بدل دیں۔“ [سنن ابي داود/كتاب الزكاة /حدیث: 1654]