سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: جو استطاعت کے باوجود قربانی نہ کرے، وہ ہماری عیدگاہ کے قریب مت آئے۔ اور ایک موقع پر فرمایا: جو وسعت کے باوجود قربانی نہ کرے وہ ہماری عیدگاہ کے قریب نہ آئے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأضاحي/حدیث: 7756]

سیدنا ابوہریرہ رضی اللہ عنہ فرماتے ہیں: جو شخص وسعت پاتا ہو، لیکن ہمارے ساتھ قربانی نہ کرے، وہ ہماری عیدگاہ کے قریب بھی نہ آئے۔ ٭٭ عبداللہ بن وہب نے اس کو موقوف رکھا ہے، تاہم ثقہ کی زیادتی قبول ہوتی ہے۔ اور ابوعبدالرحمن مقری کا مرتبہ تو ثقہ سے بھی بلند ہے۔ [المستدرك على الصحيحين/كتاب الأضاحي/حدیث: 7757]

حارث بن عمرو رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: جو فرع کرنا چاہے، وہ فرع کر لے اور عتر کرنا چاہے وہ عتر کر لے۔ اور بکریوں میں ان کی قربانی کرے (زمانہ جاہلیت میں لوگ نذر مانتے تھے کہ اگر ان کا فلاں کام ہو جائے یا ان کی بکریاں فلاں تعداد تک پہنچ جائیں تو ہر دس کے بدلے میں ایک بکری ذبح کریں گے، اس کا نام وہ عتیرہ رکھتے تھے۔ ابتدائے اسلام میں یہ سلسلہ جاری تھا لیکن بعد میں اس کو منسوخ کر دیا گیا۔ خطابی کہتے ہیں: عتیرہ اس بکری کو کہتے ہیں جو زمانہ جاہلیت میں لوگ بتوں کے نام پر ذبح کیا کرتے تھے۔ اور جب کسی کے اونٹوں کی تعداد ایک سو تک پہنچ جاتی تو وہ ایک گائے بت کے نام پر ذبح کرتا اس کو ” فرع “ کہتے تھے۔ ابتدائے اسلام میں یہ جائز تھا، بعد میں اسے بھی منسوخ کر دیا گیا۔) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأضاحي/حدیث: 7758]

سیدنا ابوسعید خدری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اے مدینہ والو! قربانی کا گوشت تین دن سے زیادہ مت کھایا کرو، انہوں نے رسول اللہ صلی اللہ علیہ وسلم کی بارگاہ میں فریاد کی کہ ان کے بچے، نوکر اور خدام بھی ہیں۔ تب رسول اللہ صلی اللہ علیہ وسلم نے ان کو کھانے، پینے کے ساتھ ساتھ سنبھال کر رکھنے کی بھی اجازت دے دی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأضاحي/حدیث: 7759]