خالد الحذاء کہتے ہیں کہ میں نے سیدنا حسن بصری رحمہ اللہ سے آیت کریمہ: ﴿مَا أَنْتُمْ عَلَيْهِ بِفَاتِنِينَ ٭ إِلَّا مَنْ هُوَ صَالِ الْجَحِيمِ﴾ [سورة الصافات: 162-163] (کی تفسیر) کے متعلق دریافت کیا تو انہوں نے فرمایا: ”یہ اللہ تعالیٰ نے اسی کے لیے لازم کیا ہے جو جہنم میں جلنے والا ہوا۔“ (یہ مذکورہ بالا روایت 4614 کی مانند ہے۔) [سنن ابي داود/كتاب السنة /حدیث: 4616]

جناب حمید سے منقول ہے کہ سیدنا حسن بصری رحمہ اللہ کہا کرتے تھے کہ: ”آسمان سے زمین پر گر پڑنا مجھے اس سے زیادہ پسند ہے کہ میں یوں کہوں کہ معاملہ میرے ہاتھ میں ہے۔“ (مقصد یہ ہے کہ تقدیر کا انکار مجھے ہرگز ہرگز گوارا نہیں) [سنن ابي داود/كتاب السنة /حدیث: 4617]

جناب حمید نے بیان کیا کہ سیدنا حسن بصری رضی اللہ عنہ مکہ آئے تو وہاں کے علماء و فقہاء نے مجھ سے کہا کہ میں ان سے یہ کہوں کہ وہ ایک دن ہمیں وعظ سنائیں۔ تو انہوں نے قبول کر لیا۔ چنانچہ وہ جمع ہو گئے اور حسن بصری رضی اللہ عنہ نے درس دیا تو میں نے ان سے بڑھ کر کسی کو خطیب نہ پایا۔ ایک آدمی نے پوچھا: ”ابوسعید! شیطان کو کس نے پیدا کیا ہے؟“ وہ کہنے لگے: ” «سُبْحَانَ اللّٰهِ» ”اللہ پاک ہے“، بھلا اللہ کے سوا بھی کوئی خالق ہے؟ اللہ ہی نے شیطان کو پیدا کیا ہے۔ خیر اور شر کا خالق وہی ہے۔“ تو وہ آدمی کہنے لگا: ”اللہ ان کو ہلاک کرے (نامعلوم) کس بنا پر وہ اس شیخ پر جھوٹ بولتے ہیں۔“ [سنن ابي داود/كتاب السنة /حدیث: 4618]

جناب حمید الطویل نے سیدنا حسن بصری رحمہ اللہ سے روایت کیا کہ انہوں نے اس آیت کریمہ ﴿كَذَلِكَ نَسْلُكُهُ فِي قُلُوبِ الْمُجْرِمِينَ﴾ [سورة الحجر: 12] ”ایسے ہی ہم یہ بات مجرموں کے دلوں میں ڈال دیتے ہیں۔“ کی تفسیر میں کہا: ”اس سے مراد شرک ہے۔“ [سنن ابي داود/كتاب السنة /حدیث: 4619]

عبید الصید، سیدنا حسن بصری رحمہ اللہ سے روایت کرتے ہیں کہ انہوں نے آیتِ کریمہ ﴿وَحِيلَ بَيْنَهُمْ وَبَيْنَ مَا يَشْتَهُونَ﴾ [سورة سبإ: 54] کی تفسیر میں کہا کہ ”ان کے اور ان کے ایمان لانے کی خواہش میں رکاوٹ کر دی جائے گی۔“ [سنن ابي داود/كتاب السنة /حدیث: 4620]

جناب ابن عون رحمہ اللہ کہتے ہیں: ”میں ملک شام میں تھا کہ پیچھے سے کسی نے مجھ کو آواز دی۔ میں متوجہ ہوا تو دیکھا کہ جناب رجاء بن حیوہ رحمہ اللہ تھے۔“ انہوں نے کہا: ”ابو عون! یہ کیا باتیں ہیں جو لوگ حسن بصری رحمہ اللہ کے متعلق کہہ رہے ہیں؟“ میں نے کہا: ”یہ لوگ حسن رحمہ اللہ پر بہت جھوٹ بول رہے ہیں۔“ [سنن ابي داود/كتاب السنة /حدیث: 4621]

ایوب نے بیان کیا کہ ”سیدنا حسن بصری رحمہ اللہ پر جھوٹ بولنے والے دو طرح کے لوگ ہیں۔ ایک وہ جو تقدیر کے منکر ہیں، ان کی خواہش ہے کہ اس طرح سے اپنی بات اور رائے کو شہرت دے لیں اور عام کر دیں۔ اور دوسرے وہ ہیں جن کے دلوں میں بغض اور عداوت ہے (اور اس طرح باتیں کرتے ہیں): ”کیا یہ اس کا قول نہیں، کیا اس نے اس طرح نہیں کہا ہے؟“ وغیرہ۔“ [سنن ابي داود/كتاب السنة /حدیث: 4622]

جناب قرہ بن خالد رحمہ اللہ ہم سے کہا کرتے تھے: ”اے جوانو! حسن بصری رحمہ اللہ کے بارے میں مغلوب نہ ہو جانا۔ بلاشبہ ان کی رائے سنت کے مطابق اور حق و صواب (کے تابع) تھی۔“ [سنن ابي داود/كتاب السنة /حدیث: 4623]

ابن عون رحمہ اللہ نے کہا: ”اگر ہمیں یہ علم ہوتا کہ حسن بصری رحمہ اللہ کی کہی ہوئی بات اس حد تک پہنچ جائے گی جہاں تک کہ پہنچی تو ہم ان کے رجوع کے متعلق ایک کتاب لکھتے اور اس پر گواہیاں قائم کرتے۔ لیکن ہم سمجھے کہ ایک بات تھی جو ہو گئی سو ہو گئی، مشہور نہ ہو گی۔“ [سنن ابي داود/كتاب السنة /حدیث: 4624]

ایوب کہتے ہیں کہ حسن بصری رحمہ اللہ نے مجھ سے کہا: ”میں آئندہ کبھی ایسی بات نہیں کہوں گا۔ (جس میں تقدیر کے انکار کا شبہ ہو۔)“ [سنن ابي داود/كتاب السنة /حدیث: 4625]