عثمان بن مرہ نے کہا کہ میں نے قاسم (بن محمد) سے مزارعت (مضاربت) کے متعلق پوچھا تو انہوں نے حضرت رافع بن خدیج رضی اللہ عنہ سے بیان کیا کہ ”رسول اللہ صلی اللہ علیہ وسلم نے محاقلہ اور مزابنہ سے منع فرمایا ہے۔“ امام ابوعبدالرحمن (نسائی) رحمہ اللہ نے ایک دوسری بار یوں فرمایا۔ [سنن نسائي/كتاب المزارعة/حدیث: 3918]

حضرت عثمان بن مرہ نے کہا کہ میں نے حضرت قاسم سے زمین کرائے پر دینے کے بارے میں پوچھا تو انہوں نے فرمایا: حضرت رافع بن خدیج رضی اللہ عنہ سے روایت ہے کہ رسول اللہ صلی اللہ علیہ وسلم نے ”زمین کو کرائے (بٹائی یا ٹھیکے) پر دینے سے منع فرمایا ہے“۔ اس حدیث میں سعید بن مسیب پر اختلاف کیا گیا ہے۔ [سنن نسائي/كتاب المزارعة/حدیث: 3919]

حضرت ابوجعفر عمیر بن یزید خطمی سے روایت ہے کہ میرے چچا نے مجھے اور اپنے ایک غلام کو حضرت سعید بن مسیب رحمہ اللہ کے پاس بٹائی کے بارے میں پوچھنے کے لیے بھیجا، تو وہ فرمانے لگے کہ حضرت عبداللہ بن عمر رضی اللہ عنہما اس میں کوئی حرج نہیں سمجھتے تھے حتیٰ کہ ان کے پاس حضرت رافع بن خدیج رضی اللہ عنہ کی حدیث پہنچی تو وہ ان سے جا کر ملے۔ حضرت رافع بن خدیج رضی اللہ عنہ نے فرمایا: نبی اکرم صلی اللہ علیہ وسلم بنو حارثہ کے ہاں تشریف لائے تو آپ صلی اللہ علیہ وسلم نے ایک کھیت دیکھا، آپ صلی اللہ علیہ وسلم نے فرمایا: ”ظہیر کی کھیتی کس قدر اچھی ہے؟“ لوگوں نے کہا: یہ کھیتی ظہیر کی نہیں۔ آپ صلی اللہ علیہ وسلم نے فرمایا: ”کیا یہ ظہیر کی زمین نہیں؟“ لوگوں نے کہا: ضرور یہ زمین اسی کی ہے مگر اس نے آگے کرائے پر دے رکھی ہے۔ رسول اللہ صلی اللہ علیہ وسلم نے فرمایا: ”اپنی کھیتی لو اور اس سے اس کا خرچہ واپس کر دو۔“ حضرت رافع رضی اللہ عنہ نے فرمایا: ہم نے اپنی کھیتی (فصل) لے لی اور مزارع کو اس کا خرچہ اور محنت واپس کر دی۔ طارق بن عبدالرحمن نے اس روایت کو حضرت سعید بن مسیب رحمہ اللہ سے روایت کیا ہے لیکن راویوں نے اس حدیث میں ان پر اختلاف کیا ہے۔ [سنن نسائي/كتاب المزارعة/حدیث: 3920]

حضرت رافع بن خدیج رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ”محاقلہ اور مزابنہ سے منع فرمایا ہے۔“ حضرت سعید رحمہ اللہ نے فرمایا: کاشت کار تین قسم کے ہوتے ہیں: ایک تو وہ جس کی اپنی زمین ہے اور وہ اس میں کاشت کرتا ہے۔ دوسرا وہ شخص جسے کچھ عرصے کے لیے زمین کاشت کے لیے (بطور عطیہ) دے دی جاتی ہے اور وہ اس میں کاشت کرتا ہے۔ تیسرا وہ جو زمین سونے چاندی کے عوض کرائے (ٹھیکے) پر لیتا ہے۔ (امام نسائی رحمہ اللہ نے فرمایا کہ) اسرائیل نے اس روایت کو طارق سے سن کر جدا کیا، چنانچہ اس نے پہلے کلام کو مرسل کیا اور آخری کلام «أَنْ يَزْرَعَ ثَلَاثَةٌ...» ”کہ کاشت کاری تین طرح کے لوگ کرتے ہیں“ کے متعلق کہا کہ یہ حضرت سعید بن مسیب رحمہ اللہ کا قول ہے، حدیثِ رسول نہیں۔ [سنن نسائي/كتاب المزارعة/حدیث: 3921]

حضرت سعید بن مسیب رحمہ اللہ بیان کرتے ہیں کہ رسول اللہ صلی اللہ علیہ وسلم نے محاقلہ سے منع فرمایا ہے۔ سعید رحمہ اللہ نے کہا... اور آگے انہوں نے اسی (مذکورہ روایت) کی طرح ذکر کیا (یعنی «أَنْ يَزْرَعَ ثَلَاثَةٌ» ”کہ تین شخص کاشت کریں“) سفیان ثوری رحمہ اللہ نے بھی طارق سے یہ حدیث روایت کی ہے (جس طرح کہ اسرائیل نے طارق سے روایت کی ہے)۔ [سنن نسائي/كتاب المزارعة/حدیث: 3922]

حضرت طارق رحمہ اللہ سے روایت ہے کہ میں نے حضرت سعید بن مسیب رحمہ اللہ کو فرماتے سنا کہ کاشتکاری تین قسم ہی کی ہو سکتی ہے: اپنی مملوکہ زمین میں کاشت کی جائے، وقتی عطیے کے طور پر ملی ہوئی زمین میں کاشت کی جائے یا خالی زمین سونے چاندی (یعنی روپے پیسے) کے عوض ٹھیکے پر لے کر کاشت کی جائے۔ امام زہری رحمہ اللہ نے کلامِ اول کو سعید بن مسیب رحمہ اللہ سے روایت کیا اور انہوں نے اسے مرسل بیان کیا ہے۔ [سنن نسائي/كتاب المزارعة/حدیث: 3923]

حضرت سعید بن مسیب رضی اللہ عنہ سے مروی ہے کہ رسول اللہ صلی اللہ علیہ وسلم نے ”محاقلہ اور مزابنہ سے منع فرمایا ہے“۔ محمد بن عبدالرحمن بن لبیبہ نے اسے سعید بن مسیب سے روایت کیا اور انہوں نے کہا کہ یہ سعد بن ابی وقاص رضی اللہ عنہ سے مروی ہے۔ [سنن نسائي/كتاب المزارعة/حدیث: 3924]

حضرت سعد بن ابی وقاص رضی اللہ عنہ سے مروی ہے کہ رسول اللہ صلی اللہ علیہ وسلم کے زمانے میں فالتو زمین رکھنے والے اپنی زمینیں پانی کے نالوں کے قریب اگنے والی فصل کے عوض بٹائی پر دیا کرتے تھے۔ پھر (بسا اوقات) لوگ رسول اللہ صلی اللہ علیہ وسلم کے پاس حاضر ہو کر اس کی بابت آپس میں لڑتے جھگڑتے، چنانچہ رسول اللہ صلی اللہ علیہ وسلم نے ان کو اس طرح بٹائی پر دینے سے منع کر دیا اور فرمایا: ”سونے چاندی (روپے پیسے) کے عوض ٹھیکے پر دیا کرو۔“ سلیمان نے رافع سے یہ حدیث بیان کی تو کہا: «عَنْ رَجُلٍ مِنْ عُمُومَتِهِ» (ان کے چچاؤں میں سے ایک صاحب سے)۔ [سنن نسائي/كتاب المزارعة/حدیث: 3925]

حضرت رافع بن خدیج رضی اللہ عنہ سے مروی ہے کہ ہم رسول اللہ صلی اللہ علیہ وسلم کے زمانے میں اپنی زمینیں پیداوار کی تہائی یا چوتھائی یا مقررہ مقدار میں غلے کے عوض بٹائی پر دیا کرتے تھے۔ ایک دن میرے چچاؤں میں سے کوئی صاحب آئے اور کہنے لگے: رسول اللہ صلی اللہ علیہ وسلم نے مجھے ایسے کام سے روک دیا ہے جو ہمارے لیے بہت مفید تھا، جبکہ اللہ تعالیٰ اور اس کے رسول صلی اللہ علیہ وسلم کی اطاعت ہمارے لیے ہر چیز سے بڑھ کر مفید ہے۔ آپ صلی اللہ علیہ وسلم نے ہمیں زمینیں پیداوار کے تہائی یا چوتھائی حصے یا معین غلے کے عوض بٹائی پر دینے سے منع فرما دیا ہے، اور آپ صلی اللہ علیہ وسلم نے زمین کے مالک کو حکم دیا ہے کہ ”وہ خود کاشت کرے یا کسی (مسلمان بھائی) کو بلا معاوضہ کاشت کے لیے دے دے۔“ آپ صلی اللہ علیہ وسلم نے بٹائی ٹھیکے وغیرہ کو سخت ناپسند فرمایا ہے۔ ایوب نے یعلی بن حکیم سے یہ حدیث نہیں سنی۔ [سنن نسائي/كتاب المزارعة/حدیث: 3926]

ایوب بیان کرتے ہیں کہ یعلی بن حکیم نے مجھے لکھا ہے کہ میں نے سلیمان بن یسار سے سنا، وہ حضرت رافع بن خدیج رضی اللہ عنہ سے حدیث بیان کرتے تھے کہ حضرت رافع بن خدیج رضی اللہ عنہ نے فرمایا: ہم اپنی فالتو زمینیں پیداوار کی تہائی یا چوتھائی یا معین غلے کے عوض بٹائی پر دیا کرتے تھے۔ سعید نے یہ روایت یعلی بن حکیم سے بیان کی ہے۔ [سنن نسائي/كتاب المزارعة/حدیث: 3927]