نبی صلی اللہ علیہ وسلم کی زوجہ محترمہ حضرت عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا: ”اے عائش! یہ جبرئیل علیہ السلام تمہیں سلام کہتے ہیں۔“ میں نے کہا: ”ان پر سلام اور اللہ کی رحمت ہو۔“ حضرت عائشہ رضی اللہ عنہا نے مزید کہا: ”آپ صلی اللہ علیہ وسلم وہ چیزیں دیکھتے تھے جو ہم نہیں دیکھ سکتے۔“ [صحيح البخاري/كتاب الأدب/حدیث: 6201]

حضرت انس رضی اللہ عنہ سے روایت ہے، انہوں نے کہا کہ حضرت ام سلیم رضی اللہ عنہا سامانِ سفر کے ساتھ تھیں اور نبی صلی اللہ علیہ وسلم کے غلام حضرت انجشہ رضی اللہ عنہ عورتوں کے اونٹ ہانک رہے تھے۔ نبی صلی اللہ علیہ وسلم نے فرمایا: ”اے انجشہ! ان آبگینوں کے ساتھ نرمی کرو۔“ [صحيح البخاري/كتاب الأدب/حدیث: 6202]

حضرت انس رضی اللہ عنہ سے روایت ہے انہوں نے کہا کہ ”نبی صلی اللہ علیہ وسلم اخلاق کے اعتبار سے تمام لوگوں سے اچھے تھے۔ میرا ایک بھائی ابو عمیر نامی تھا، میرا خیال ہے وہ دودھ چھوڑ چکا تھا۔ آپ صلی اللہ علیہ وسلم جب ہمارے ہاں تشریف لاتے تو اسے فرماتے: «يَا أَبَا عُمَيْرٍ، مَا فَعَلَ النُّغَيْرُ؟» ”اے ابو عمیر! تیری نغیر (چڑیا) تو بخیر ہے؟“ وہ اس چڑیا کے ساتھ کھیلا کرتا تھا۔ بسا اوقات نماز کا وقت ہو جاتا جبکہ آپ ہمارے گھر میں تشریف فرما ہوتے تو آپ وہ چٹائی بچھانے کا حکم دیتے جس پر آب چھڑک دیا جاتا، پھر آپ کھڑے ہو جاتے اور ہم آپ کے پیچھے کھڑے ہوتے تو آپ ہمیں نماز پڑھاتے۔“ [صحيح البخاري/كتاب الأدب/حدیث: 6203]

حضرت سہل بن سعد رضی اللہ عنہ سے روایت ہے، انہوں نے کہا کہ حضرت علی رضی اللہ عنہ کو ان کی کنیت، ابو تراب، بہت پیاری لگتی تھی۔ وہ جب انہیں اس کنیت سے آواز دیتے تو بہت خوش ہوتے کیونکہ ابو تراب کی کنیت خود نبی صلی اللہ علیہ وسلم نے رکھی تھی۔ ایک دن وہ حضرت فاطمہ رضی اللہ عنہا سے خفا ہو کر باہر چلے گئے اور مسجد کی دیوار کے پاس لیٹ گئے۔ نبی صلی اللہ علیہ وسلم انہیں تلاش کرتے ہوئے ان کے پیچھے آئے تو فرمایا: ”یہ تو دیوار کے پاس لیٹے ہوئے ہیں۔“ جب نبی صلی اللہ علیہ وسلم ان کے پاس تشریف لائے تو ان کی پشت مٹی سے بھری ہوئی تھی۔ آپ صلی اللہ علیہ وسلم ان کی پشت سے مٹی جھاڑتے ہوئے فرمانے لگے: ” «قُمْ أَبَا تُرَابٍ» اے ابو تراب! اٹھ جاؤ۔“ [صحيح البخاري/كتاب الأدب/حدیث: 6204]

حضرت ابوہریرہ رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”قیامت کے دن اللہ کے ہاں سب سے برا نام اس شخص کا ہوگا جس نے اپنا نام «مَلِكُ الْأَمْلَاكِ» (شہنشاہ مہاراج) رکھا۔“ [صحيح البخاري/كتاب الأدب/حدیث: 6205]

حضرت ابوہریرہ رضی اللہ عنہ ہی سے روایت ہے، وہ رسول اللہ صلی اللہ علیہ وسلم سے بیان کرتے ہیں کہ آپ نے فرمایا: ”اللہ کے نزدیک سب سے بدترین نام اس شخص کا ہوگا جو اپنا نام «مَلِكُ الْأَمْلَاكِ» ”ملک الاملاک“ رکھے گا۔“ سفیان بیان کرتے ہیں کہ ابوالزناد کے غیر نے کہا: ” «مَلِكُ الْأَمْلَاكِ» ”ملک الاملاک“ کا مفہوم شاہان شاہ ہے۔“ [صحيح البخاري/كتاب الأدب/حدیث: 6206]

حضرت اسامہ بن زید رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم ایک مرتبہ ایک گدھے پر سوار ہوئے جس پر فدک کی بنی ہوئی چادر بچھی تھی، جبکہ اسامہ رضی اللہ عنہ آپ کے پیچھے سوار تھے۔ آپ صلی اللہ علیہ وسلم قبیلہ بنی حارث بن خزرج میں حضرت سعد بن عبادہ رضی اللہ عنہ کی عیادت (بیمار پرسی) کے لیے تشریف لے جا رہے تھے، یہ واقعہ غزوہ بدر سے پہلے کا ہے۔ دونوں حضرات چلتے رہے یہاں تک کہ ایک مجلس کے پاس سے گزرے جس میں عبداللہ بن ابی بن سلول بھی تھا، جبکہ وہ ابھی مسلمان نہیں ہوا تھا۔ اس مجلس میں کچھ مسلمان بھی تھے اور بتوں کی پرستش کرنے والے مشرک اور یہودی بھی تھے۔ مسلمانوں میں حضرت عبداللہ بن رواحہ رضی اللہ عنہ بھی موجود تھے، جب مجلس پر سواری کا غبار اڑ کر پڑا تو عبداللہ بن ابی نے چادر سے اپنی ناک ڈھانپ لی اور کہنے لگا: ”ہم پر غبار نہ اڑاؤ۔“ رسول اللہ صلی اللہ علیہ وسلم نے اہل مجلس کو سلام کیا۔ پھر وہاں ٹھہر گئے اور سواری سے اترے اور انہیں اللہ کے دین کی دعوت دی، نیز انہیں قرآن پڑھ کر سنایا۔ عبداللہ بن ابی نے کہا: ”اے بھلے آدمی! جو کچھ تم نے پڑھ کر سنایا ہے اس سے بہتر کوئی کلام نہیں ہو سکتا، اگر یہ حق ہے تو بھی ہماری مجالس میں آ کر اس کی وجہ سے ہمیں اذیت نہ دیا کرو، ہاں جو تمہارے پاس آئے اسے یہ قصے سنا دیا کرو۔“ حضرت عبداللہ بن رواحہ رضی اللہ عنہ نے کہا: ”کیوں نہیں، اے اللہ کے رسول! آپ ہماری مجالس میں ضرور تشریف لایا کریں، ہم اسے پسند کرتے ہیں۔“ اس معاملے پر مسلمانوں، مشرکین اور یہودیوں کا باہمی جھگڑا ہو گیا۔ قریب تھا کہ وہ ایک دوسرے کے ساتھ لڑائی پر اتر آئیں لیکن رسول اللہ صلی اللہ علیہ وسلم انہیں خاموش کراتے رہے۔ آخر جب تمام لوگ خاموش ہو گئے تو رسول اللہ صلی اللہ علیہ وسلم اپنی سواری پر بیٹھ کر (وہاں سے) تشریف لے گئے۔ جب آپ صلی اللہ علیہ وسلم حضرت سعد بن عبادہ رضی اللہ عنہ کے پاس پہنچے تو رسول اللہ صلی اللہ علیہ وسلم نے ان سے فرمایا: ”اے سعد! کیا تم نے نہیں سنا کہ آج ابو حباب نے کس طرح کی باتیں کی ہیں؟“ (آپ صلی اللہ علیہ وسلم کا اشارہ عبداللہ بن ابی کی طرف تھا) ”اس نے ایسا ایسا کہا ہے۔“ حضرت سعد بن عبادہ رضی اللہ عنہ نے کہا: ”اے اللہ کے رسول! میرے ماں باپ آپ پر قربان ہوں، آپ اسے معاف کر دیں اور اس سے درگزر فرمائیں۔ اس ذات کی قسم جس نے آپ پر کتاب نازل فرمائی ہے! اللہ تعالیٰ نے وہ حق آپ کو عطا فرما دیا ہے جو آپ پر اتارا ہے، آپ کے تشریف لانے سے پہلے اس بستی (مدینہ طیبہ) کے باشندے اس امر پر متفق ہو گئے تھے کہ اس کے سر پر تاج رکھیں اور اسے سرداروں کی سی پگڑی باندھیں، لیکن جب اللہ تعالیٰ نے اس سچے کلام کے ذریعے آپ کو مبعوث فرمایا تو وہ اس بات سے چڑ گیا اور جو کچھ آپ نے آج ملاحظہ فرمایا ہے وہ اسی جلن کی وجہ سے ہے۔“ رسول اللہ صلی اللہ علیہ وسلم نے اسے (عبداللہ بن ابی کو) معاف کر دیا۔ رسول اللہ صلی اللہ علیہ وسلم اور آپ کے صحابہ کرام رضی اللہ عنہم اللہ کے حکم کے مطابق مشرکین اور اہل کتاب سے اسی طرح درگزر کیا کرتے تھے اور ان کی طرف سے پہنچنے والی تکلیفوں پر صبر کیا کرتے تھے جس طرح انہیں اللہ نے حکم دیا تھا۔ ارشاد باری تعالیٰ ہے: ﴿لَتَسْمَعُنَّ مِنَ الَّذِينَ أُوتُوا الْكِتَابَ مِن قَبْلِكُمْ وَمِنَ الَّذِينَ أَشْرَكُوا أَذًى كَثِيرًا﴾ [سورة آل عمران: 186] ”تم یقیناً ان لوگوں سے جنہیں تم سے پہلے کتاب دی گئی ہے (تکلیف دہ باتیں) ضرور سنو گے۔“ اور دوسرے مقام پر فرمایا: ﴿وَدَّ كَثِيرٌ مِّنْ أَهْلِ الْكِتَابِ لَوْ يَرُدُّونَكُم مِّن بَعْدِ إِيمَانِكُمْ كُفَّارًا﴾ [سورة البقرة: 109] ”اہل کتاب میں سے بہت سے یہ خواہش کرتے ہیں (کہ تم کو ایمان لانے کے بعد کافر بنا دیں)“، چنانچہ رسول اللہ صلی اللہ علیہ وسلم انہیں معاف کرنے کے متعلق اللہ کے حکم کے مطابق عمل کیا کرتے تھے یہاں تک کہ آپ کو ان کے خلاف جہاد کرنے کی اجازت عطا فرمائی گئی۔ پھر جب رسول اللہ صلی اللہ علیہ وسلم نے غزوہ بدر کا معرکہ لڑا اور اللہ کے حکم سے اس میں کفار کے بڑے بڑے بہادر اور قریش کے سردار قتل کیے گئے تو رسول اللہ صلی اللہ علیہ وسلم اپنے صحابہ کرام رضی اللہ عنہم کے ساتھ فتح مند ہو کر اور مال غنیمت لے کر لوٹے، ان کے ساتھ کافروں کے بڑے بڑے سرغنے اور قریش کے سردار قیدی بھی تھے۔ اس وقت عبداللہ بن ابی اور اس کے مشرک ساتھیوں اور دیگر بت پرستوں نے کہا: ”اب اسلام کا معاملہ غالب آ چکا ہے“، چنانچہ انہوں نے رسول اللہ صلی اللہ علیہ وسلم سے اسلام پر بیعت کر لی اور (بظاہر) مسلمان ہو گئے۔ [صحيح البخاري/كتاب الأدب/حدیث: 6207]

حضرت عباس بن عبد المطلب رضی اللہ عنہ سے روایت ہے، انہوں نے عرض کی: ”اللہ کے رسول! کیا آپ نے ابوطالب کو کوئی فائدہ پہنچایا؟ کیونکہ وہ آپ کی حفاظت کرتا تھا اور آپ کی خاطر لوگوں سے ناراض ہوتا تھا؟“ آپ صلی اللہ علیہ وسلم نے فرمایا: ”ہاں! میری وجہ سے وہ اس جگہ میں ہے جہاں ٹخنوں تک آگ ہے، اگر میں نہ ہوتا تو وہ دوزخ کے نچلے طبقے میں ہوتا۔“ [صحيح البخاري/كتاب الأدب/حدیث: 6208]