سیدنا انس رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”جو شخص اللہ تعالیٰ کے فیصلے پر ایمان نہ رکھے اور اللہ کی تقدیر پر ایمان رکھتا ہو، تو وہ اللہ تعالیٰ کے علاوہ کوئی معبود ڈھونڈ لے۔“ [معجم صغير للطبراني/كتاب الإيمان/حدیث: 51]

سیدنا سہل بن سعد سعدی رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”چھوٹے چھوٹے گناہوں سے اپنے آپ کو بچاؤ، چھوٹے گناہوں کی مثال اس قوم کی ہے جو ایک وادی میں گئے تو یہ بھی ایک لکڑی لے آیا اور وہ بھی لے آیا، انہوں نے اتنا ایندھن اکٹھا کر لیا جس سے انہوں نے اپنی روٹی پکا لی۔ اور چھوٹے گناہوں والا پکڑ لیا جاتا ہے تو وہ اس کو ہلاک کر دیتے ہیں۔“ [معجم صغير للطبراني/كتاب الإيمان/حدیث: 52]

سیدنا علی رضی اللہ عنہ کوفہ کے منبر پر یوں کہنے لگے: میں نے رسول اللہ صلی اللہ علیہ وسلم کو یہ فرماتے ہوئے سنا کہ: ”زانی زنا کرتے وقت ایماندار نہیں رہتا، اور چور چوری کرتے وقت ایماندار نہیں ہوتا، اور لوٹ مار کرنے والا جب وہ لوٹتا ہے تو وہ ایماندار نہیں رہتا، اور آدمی شراب پیتے وقت بھی ایماندار نہیں رہتا۔“ کسی نے کہا: اے امیر المؤمنین! جو زنا کرے تو کیا وہ کافر ہو جاتا ہے؟ سیدنا علی رضی اللہ عنہ نے کہا: رسول اللہ صلی اللہ علیہ وسلم ہمیں رخصتوں کی احادیث مبہم رکھنے کا حکم فرماتے تھے، مومن زنا کو حلال سمجھ کر نہیں کرتا، اگر وہ اسے حلال سمجھے تو وہ کافر ہو جاتا ہے۔ اسی طرح مومن چوری کو حلال نہیں سمجھتا، اگر وہ اس کے حلال ہونے پر ایمان لائے تو وہ کافر ہو جاتا ہے۔ اور جب وہ شراب پیے اور یہ ایمان رکھے کہ وہ اس کے لیے حلال ہے تو وہ کافر ہوگا، اسی طرح لوٹنے والا اس کو مومن ہوتے ہوئے حلال نہیں سمجھتا، اگر اسے حلال سمجھے تو وہ کافر ہو جاتا ہے۔ [معجم صغير للطبراني/كتاب الإيمان/حدیث: 53]

سیدنا علی رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”جس نے مجھ پر جان بوجھ کر جھوٹ بولا تو وہ اپنی جگہ جہنم بنا لے۔“ [معجم صغير للطبراني/كتاب الإيمان/حدیث: 54]

سیدنا علی رضی اللہ عنہ کہتے ہیں: ایک دفعہ رسول اللہ صلی اللہ علیہ وسلم ایک لکڑی کے ساتھ زمین کرید رہے تھے، پھر سر اٹھایا اور فرمایا: ”ہر ذی روح جاندار کی جگہ جنت اور جہنم میں لکھی ہوئی ہے، نیز اس کا نیک بخت اور بدبخت ہونا بھی۔“ تو ایک شخص کہنے لگا: یا رسول اللہ! پھر ہم عمل کرنا چھوڑ دیں؟ آپ صلی اللہ علیہ وسلم نے فرمایا: ”نہیں! بلکہ تم عمل کرو، کیونکہ ہر آدمی کے لیے وہ راہ آسان کر دی گئی ہے جس کے لیے وہ پیدا کیا گیا۔ نیک بخت لوگ نیک بختی کی راہ کے لیے آسان کیے جاتے ہیں، اور بدبخت لوگ بدبختی کی طرف آسان کیے جاتے ہیں۔“ پھر آپ صلی اللہ علیہ وسلم نے یہ آیت پڑھی: ﴿فَأَمَّا مَنْ أَعْطَىٰ وَاتَّقَى ۝ وَصَدَّقَ بِالْحُسْنَىٰ﴾ ”جس نے دیا (اللہ کی راہ میں) اور ڈرا (اپنے رب سے)۔ اور نیک بات کی تصدیق کرتا رہے گا۔“ [معجم صغير للطبراني/كتاب الإيمان/حدیث: 55]

سیدنا ابوسعید خدری رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”آسمان میں ایک فرشتہ ہے جس کو اسماعیل کہتے ہیں، وہ ستر ہزار فرشتوں پر ہے، جن میں سے ہر ایک فرشتہ ستر ہزار فرشتوں پر ہے۔“ [معجم صغير للطبراني/كتاب الإيمان/حدیث: 56]

سیدنا انس بن مالک رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”کوئی آدمی ایمان کی حقیقت کو اس وقت تک نہیں پا سکتا جب تک وہ اپنی زبان کو بند نہ کرے۔“ [معجم صغير للطبراني/كتاب الإيمان/حدیث: 57]

سیدنا عبداللہ بن مسعود رضی اللہ عنہ کہتے ہیں: میں رسول اللہ صلی اللہ علیہ وسلم کے پاس تھا کہ ایک یہودی آپ صلی اللہ علیہ وسلم کے ہاں آیا اور کہنے لگا: اے ابوالقاسم ( صلی اللہ علیہ وسلم )! روح کیا چیز ہے؟ تو اللہ تعالیٰ نے یہ آیت نازل فرمائی: ﴿وَيَسْأَلُونَكَ عَنِ الرُّوحِ قُلِ الرُّوحُ مِنْ أَمْرِ رَبِّي﴾ ”آپ سے روح کے متعلق پوچھتے ہیں، کہہ دیں روح میرے رب کا امر ہے۔“ [معجم صغير للطبراني/كتاب الإيمان/حدیث: 58]

سیدنا علی رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”میں اپنی امت پر کسی مومن یا مشرک سے نہیں ڈرتا کیونکہ مومن کو ایمان زیادتی کرنے سے روکے گا، اور مشرک کو کفر ہلاک کر دے گا، لیکن میں تم میں اس منافق سے ڈرتا ہوں جو صرف زبان سے عالم ہو، وہ باتیں تو وہ کرے گا جنہیں تم جانتے ہو مگر وہ عمل ایسا کرے گا جو تمہارے نزدیک برا ہوگا۔“ [معجم صغير للطبراني/كتاب الإيمان/حدیث: 59]

سیدنا عباس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”کوئی بھی اس وقت مومن نہیں ہوتا یہاں تک کہ میری محبت کی وجہ سے تم سے محبت کرے، کیا ان کو یہ امید ہے کہ وہ میری شفاعت سے جنت میں داخل ہو جائیں گے مگر عبدالمطلب کی اولاد داخل نہ ہو گی؟“ [معجم صغير للطبراني/كتاب الإيمان/حدیث: 60]