موسیٰ بن عبدالعزیز سے مروی ہے انہوں نے کہا: مجھے حکم نے بیان کیا انہوں نے کہا: مجھے عکرمہ نے بیان کیا کہ سیدنا ابن عباس رضی اللہ عنہما جب بادل کے گرجنے کی آواز سنتے تو کہتے تھے «سبحان الذى سبحت له» ”پاک ہے وہ ذات جس کے لیے تو نے تسبیح بیان کی۔“ اور کہا: گرج ایک فرشتہ ہے جو بادل کو اسی طرح ہانکتا ہے جیسے چرواہا اپنی بکریوں کو ہانکتا ہے۔ [صحيح الادب المفرد/حدیث: 559]

سیدنا عبداللہ بن زبیر رضی اللہ عنہ سے مروی ہے کہ جب وہ بادل کے گرجنے کی آواز سنا کرتے تھے تو بات کرنا چھوڑ دیتے تھے اور کہتے تھے: «سبحان الذى يسبح الرعد بحمده والملائكة من خيفته» پھر کہتے تھے: یہ زمین والوں کے لیے سخت وعید ہے۔ [صحيح الادب المفرد/حدیث: 560]

اوسط بن اسماعیل سے مروی ہے انہوں نے کہا کہ میں نے نبی صلی اللہ علیہ وسلم کی وفات کے بعد سیدنا ابوبکر رضی اللہ عنہ کو کہتے سنا انہوں نے کہا: ہجرت کے پہلے سال نبی صلی اللہ علیہ وسلم اسی جگہ کھڑے ہوئے تھے جہاں میں کھڑا ہوں یہ کہہ کر سیدنا ابوبکر رضی اللہ عنہ رونے لگے اس کے بعد کہا: سچائی کو لازم کر لو کیونکہ یہ نیکی کے ساتھ ہے اور یہ دونوں جنت میں ہیں اور تم جھوٹ سے بچو کیونکہ یہ فجور کے ساتھ ہے اور یہ دونوں جہنم میں ہیں اور اللہ سے عافیت کا سوال کرو بیشک یقین کے بعد عافیت سے بہتر کوئی چیز نہیں ہے جو انسان کو دی جاتی ہے اور آپس میں قطع رحمی نہ کرو اور ایک دوسرے کا بائیکاٹ نہ کرو اور ایک دوسرے سے حسد نہ کرو، ایک دوسرے سے بغض نہ رکھو اور اللہ کے بندو بھائی بھائی بن جاؤ۔ [صحيح الادب المفرد/حدیث: 561]

سیدنا عباس بن عبدالمطلب رضی اللہ عنہ سے روایت ہے کہ وہ کہتے ہیں میں نے عرض کیا: یا رسول اللہ! مجھے کوئی دعا سکھا دیجئے میں اس کے ساتھ اللہ سے سوال کروں۔ آپ صلی اللہ علیہ وسلم نے فرمایا: اے عباس! اللہ سے عافیت مانگا کرو، پھر تین دن رکے رہے۔ پھر میں آیا اور میں نے کہا: اے اللہ کے رسول! مجھے کچھ سکھا دیجیے، میں اللہ سے سوال کروں۔ تو آپ صلی اللہ علیہ وسلم نے فرمایا: ”اے عباس! اے رسول اللہ کے چچا! اللہ سے دنیا اور آخرت میں عافیت کا سوال کرو۔“ [صحيح الادب المفرد/حدیث: 562]

سیدنا انس رضی اللہ عنہ بیان کرتے ہیں نبی صلی اللہ علیہ وسلم کے سامنے ایک شخص نے کہا: اے اللہ! تو اگر مجھے مال نہ دے جس کا میں صدقہ کروں تو مجھے کسی ایسی آزمائش میں گرفتار کر دے جس میں میرے لیے اجر ہو۔ تو آپ صلی اللہ علیہ وسلم نے کہا: ”سبحان اللہ، تم اس بات کی طاقت نہیں رکھتے، تم نے یوں کیوں نہیں کہا: اے اللہ! ہمیں دنیا میں بھی بھلائی عطا فرما اور آخرت میں بھی بھلائی عطا فرما اور ہمیں آگ کے عذاب سے بچا۔‏‏‏‏“ ایک روایت میں ان سے مروی ہے انہوں نے کہا کہ وہ داخل ہوئے۔ میں نے حمید سے کہا کیا نبی صلی اللہ علیہ وسلم داخل ہوئے انہوں نے کہا: ہاں، آپ صلی اللہ علیہ وسلم ایک آدمی کے پاس گئے جو بیمار ی سے لاچار ہو چکا تھا گویا کہ وہ چوزہ ہے جس کے پر اکھاڑے گئے، تو اس سے فرمایا:”تم اللہ سے کسی چیز کی دعا کرو یا کچھ مانگو۔“ تو وہ آدمی کہنے لگا: یا اللہ جو تو نے مجھے قیامت کو عذاب کرنا ہے وہ دنیا میں ہی کر لے۔ آپ صلی اللہ علیہ وسلم نے فرمایا: ”سبحان اللہ، تم اس کی طاقت نہیں رکھتے“ یا کہا: ”تم سب اس کی استطاعت نہیں رکھتے، تم نے یوں کیوں نہ کہا: «اللهم آتنا فى الدنيا حسنة، وفي الآخرة حسنة، وقنا عذاب النار» اور آپ نے اس کے حق میں دعا کی تو اللہ نے شفا دی۔“ [صحيح الادب المفرد/حدیث: 563]

سیدنا عبداللہ بن عمرو رضی اللہ عنہ سے روایت ہے کہ انہوں نے کہا: آدمی کہتا ہے: اے اللہ! میں تیری پناہ چاہتا ہوں آزمائش کی مشقت سے، پھر چپ ہو جائے، جب یہ کہہ چکے پھر یہ کہنا چاہیے: سوائے ایسی آزمائش کے جس میں درجات کی بلندی ہو۔ [صحيح الادب المفرد/حدیث: 564]

ابونوفل بن ابی عقرب سے روایت ہے کہ ان کے والد نے نبی صلی اللہ علیہ وسلم سے روزے کے بارے میں سوال کیا آپ صلی اللہ علیہ وسلم نے فرمایا: ”ہر ماہ میں ایک روزہ رکھ لیا کرو۔“ میں نے عرض کیا آپ پر میرے ماں باپ فدا ہوں اور زیادہ اجازت فرمائیے۔ فرمایا: ”یہ کیا ہے کہ زیادہ کریں، زیادہ کریں۔ ہر ماہ میں دوروزے رکھ لو“، میں نے عرض کیا میرے ماں باپ آپ پر قربان ہوں میں اپنے آپ کو اس سے زیادہ قوی پاتا ہوں، فرمایا: زیادہ قوی پاتا ہوں، زیادہ قوی پاتا ہوں! پھر آپ صلی اللہ علیہ وسلم خاموش ہو گئے۔ یہاں تک کہ میں نے خیال کیا کہ آپ صلی اللہ علیہ وسلم اس سے زیادہ کی ہرگز اجازت نہیں دیں گے پھر آپ صلی اللہ علیہ وسلم نے فرمایا: ”اچھا ہر ماہ تین روزے رکھ لیا کرو۔“ [صحيح الادب المفرد/حدیث: 565]

سیدنا جابر بن عبداللہ رضی اللہ عنہ بیان کرتے ہیں کہ ہم رسول اللہ صلی اللہ علیہ وسلم کے پاس تھے کہ نہایت بدبودار آندھی چلنے لگی جو اونچی ہو گئی۔ آپ صلی اللہ علیہ وسلم نے فرمایا: ”جانتے ہو یہ کیا ہے؟ یہ ان کی بدبو ہے جو ایمان داروں کی غیبت کرتے ہیں۔“ ایک روایت میں ہے کہ کچھ منافقین نے کچھ مسلمانوں کی غیبت کی ہے یہ آندھی اسی وجہ سے چلائی گئی ہے۔ [صحيح الادب المفرد/حدیث: 566]

ابن امِ عبد یعنی سیدنا ابن مسعود رضی اللہ عنہ سے مروی ہے جس کے پاس کسی مومن کی غیبت کی گئی، اس نے اس کی حمایت کی، اللہ اسے دنیا و آخرت میں بہتر بدلا دے گا، جس کے پاس کسی مومن کی غیبت کی گئی ہو اور اس نے اس کی حمایت نہ کی ہو، اللہ اسے اس کے بدلے میں دنیا آخرت میں برا بدلہ دیں گے اور کسی نے اس سے بدتر لقمہ نہیں کھایا کہ وہ مومن آدمی کی غیبت کرے اگر اس میں واقعی وہ چیز پائی جاتی ہو جس کو وہ جانتا ہو تو اس نے غیبت کی اور اگر اس نے ایسی بات کہی جس کو نہیں جانتا تو اس نے اس پر الزام تراشی کی۔ [صحيح الادب المفرد/حدیث: 567]

سیدنا جابر بن عبداللہ رضی اللہ عنہ سے مروی ہے کہ ہم رسول اللہ صلی اللہ علیہ وسلم کے ساتھ تھے کہ آپ صلی اللہ علیہ وسلم دو ایسی قبروں پر آئے جن قبر والوں پر عذاب کیا جا رہا تھا۔ آپ صلی اللہ علیہ وسلم نے فرمایا: ”ان دونوں کو کسی بڑے گناہ پر عذاب نہیں کیا جا رہا، اور کیوں نہیں، ان میں سے جو ایک ہے وہ لوگوں کی غیبت کرتا تھا اور جو دوسرا ہے وہ پیشاب کی (چھینٹوں کی) پرواہ نہیں کرتا تھا۔“ پھر آپ صلی اللہ علیہ وسلم نے کھجور کی تر شاخ منگوائی یا دو شاخیں، پھر آپ صلی اللہ علیہ وسلم نے انہیں توڑ دیا، پھر آپ صلی اللہ علیہ وسلم نے ہر ایک شاخ کے بارے میں حکم دیا کہ اس کو ایک ایک قبر پر گاڑھ دیا جائے۔ تو رسول اللہ صلی اللہ علیہ وسلم نے ارشاد فرمایا: ”سن لو ان پر عذاب ہلکا کر دیا جائے گا جب تک یہ تر رہیں گی“ یا فرمایا: ”جب تک خشک نہ ہوں گی۔“ [صحيح الادب المفرد/حدیث: 568]