حدیث حاشیہ:
اس حدیث میں بنی اسرائیل کے ایک سخی کا ذکر ہے جو صدقہ خیرات تقسیم کرنے کی نیت سے رات کو نکلا مگر اس نے لاعلمی میں پہلی رات میں اپنا صدقہ ایک چور کے ہاتھ پر رکھ دیا اور دوسری رات میں ایک فاحشہ عورت کو دے دیا اور تیسری شب میں ایک مالدار کو دیدیا‘ جو مستحق نہ تھا۔
یہ سب کچھ لاعلمی میں ہوا۔
بعد میں جب یہ واقعات اس کو معلوم ہوئے تو اس نے اپنی لا علمی کا اقرار کرتے ہوئے اللہ کی حمد بیان کی گویا یہ کہا:
اللهم لك الحمد أي لا لي أن صدقتي وقعت بید من لا یستحقها فلك الحمد حیث کان ذلك بإرادتك أي لا بإرادتي فإن إرادة اللہ کلها جمیلة۔
یعنی یا اللہ! حمد تیرے لیے ہی ہے نہ کہ میرے لیے۔
میرا صدقہ غیر مستحق کے ہاتھ میں پہنچ گیا پس حمد تیرے ہی لیے ہے۔
اس لیے کہ یہ تیرے ہی ارادے سے ہوا نہ کہ میرے ارادے سے اور اللہ پاک جو بھی چاہے اور وہ جو ارادہ کرے وہ سب بہتر ہی ہے۔
امام بخاری کا مقصد باب یہ ہے کہ ان حالات میں اگرچہ وہ صدقہ غیر مستحق کو مل گیا مگر عنداللہ وہ قبول ہوگیا۔
حدیث سے بھی یہی ظاہر ہوا کہ ناواقفی سے اگر غیر مستحق کو صدقہ دے دیا جائے تو اسے اللہ بھی قبول کرلیتا ہے اور دینے والے کو ثواب مل جاتا ہے۔
لفظ صدقہ میں نفلی صدقہ اور فرضی صدقہ یعنی زکوٰۃ ہر دو داخل ہیں۔
اسرائیلی سخی کو خواب میں بتلایا گیا یا ہاتف غیب نے خبردی یا اس زمانہ کے پیغمبر نے اس سے کہا کہ جن غیر مستحقین کو تونے غلطی سے صدقہ دے دیا‘ شاید وہ اس صدقہ سے عبرت حاصل کرکے اپنی غلطیوں سے باز آجائیں۔
چور چوری سے اور زانیہ زنا سے رک جائے اور مالدار کو خود اسی طرح خرچ کرنے کی رغبت ہو۔
ان صورتوں میں تیرا صدقہ تیرے لیے بہت کچھ موجب اجر وثواب ہوسکتا ہے۔
ھذا ھو المراد۔

حدیث حاشیہ:
(1)
اس حدیث کے انداز سے معلوم ہوتا ہے کہ وہ صدقہ اہل خیر میں سے محتاج لوگوں کے لیے مختص تھا، اسی لیے تو لوگوں نے تعجب کیا۔
اس سے یہ بھی معلوم ہوتا ہے کہ اگر صدقہ کرنے والا مخلص ہو اور اس کی نیت بھی اچھی تھی تو اس کا صدقہ اللہ کے ہاں قبول ہے اگرچہ وہ اپنے محل میں نہ پہنچ سکے۔
حدیث میں اس بات کی وضاحت نہیں کہ وہ صدقہ فرض تھا یا نفل، وہ کافی ہو گا یا نہیں۔
غالبا امام بخاری ؒ نے بھی عنوان میں اسی وجہ سے فیصلہ کن انداز اختیار نہیں کیا بلکہ استفہام کے طور پر اسے بیان کیا ہے۔
ہمارے نزدیک حدیث میں لفظ صدقہ فرض اور نفل دونوں کو شامل ہے۔
ایسے حالات میں اگرچہ وہ صدقہ غیر مستحق کو ملا ہے، تاہم عنداللہ وہ قبول ہے۔
اس کا مطلب یہ ہے کہ اگر ناواقفی میں کسی غیر مستحق کو صدقہ دے دیا جائے تو اسے اللہ قبول کر لیتا ہے اور دینے والے کو اس سے ثواب ملتا ہے بلکہ ایسے حالات میں کچھ زیادہ ہی اجروثواب کا باعث ہے۔
صدقہ کرنے والے کو دوبارہ صدقہ دینے کی چنداں ضرورت نہیں۔
(2)
اس حدیث سے اخلاص اور پوشیدہ طور پر صدقہ دینے کی اہمیت و فضیلت واضح ہوتی ہے۔
صدقہ دینے والے نے اللہ تعالیٰ کی تعریف کی، یعنی زانیہ اور چور پر صدقہ کرنے میں میری کوئی تعریف نہیں، کیونکہ ان پر صدقہ کرنا تیری ہی مشیت اور ارادے سے تھا، اگرچہ میرا ارادہ نہ تھا، تاہم جو کچھ ہوا تیری مشیت سے ہوا اور تیرا ہر ارادہ اچھا ہوتا ہے، اس لیے تعریف کا سزاوار بھی تو ہی ہے۔