لغوی تشریح:
«فَعَلِّمْنِي» تعلیم سے امر کا صیغہ ہے۔
«مَا يُجْزِئُنِي» ”زا“ کے بعد ہمزہ ہے، معنی یہ ہیں کہ جو میرے لیے کافی ہو جائے۔
«مِنْهُ» قرآن کے بدلے میں۔
«حَوْلَ» قدرت اور حیلہ۔

فوائد و مسائل:
➊ اس حدیث سے ثابت ہوا کہ اگر کسی کو قرآن پاک میں سے کچھ بھی نہیں آتا تو مجبوری کی صورت میں یہ کلمات پڑھنے سے نماز ہو جائے گی۔ علاوہ ازیں شارح مصابیح نے اشارہ کیا ہے کہ اس سائل کا سوال یہ تھا کہ میں فوری طور پر کچھ یاد نہیں کر سکتا جبکہ نماز فرض ہو چکی ہے، تب نبی صلی اللہ علیہ وسلم نے اسے یہ کلمات تعلیم فرمائے۔ [عون المعبود]
➋ اس روایت سے اگر کوئی یہ استدلال کرے کہ سورہ فاتحہ نماز میں فرض نہیں ہے تو یہ سینہ زوری ہے ورنہ کہاں مجبوری کی حالت اور کہاں غیر مجبوری۔ یہ آدمی تو معذور تھا، اس لیے معذوری کے دور ہونے تک اسے متبادل راستہ بتلایا گیا ہے۔ معذور کے لیے شریعت مطہرہ نے بہرصورت رعایت ملحوظ رکھی ہے۔ عارضی رعایت سے احکام میں تغیر و تبدل نہیں ہو جاتا۔ ایک معذور آدمی اگر یہ کہے کہ میں وضو نہیں کر سکتا اور کہا جائے کہ بھئی پھر تم تیمم کرلو تو کیا اس کا یہ مطلب لینا صحیح ہو گا کہ اب وضو فرض ہی نہیں رہا۔ کوئی بھی اس کا قائل نہیں کہ عدم استطاعت وضو کی صورت میں تیمّم کا مشورہ وضو کی فرضیت ساقط کر دے گا۔ اس لیے مجبوری کی صورت میں اگر ان کلمات کے پڑھنے کا حکم دیا گیا تو اس سے فاتحہ کی فرضیت کیسے ساقط ہو گئی؟

راویٔ حدیث: (سیدنا عبداللہ بن ابی اوفیٰ رضی اللہ عنہما) ان کی کنیت ابومحمد یا ابومعاویہ ہے۔ ان کے والد کا نام علقمہ بن حارث اسلمی ہے۔ خود بھی شرف صحابیت سے سرفراز ہوئے اور باپ بھی۔ باپ بیٹا دونوں صحابی ہیں۔ صلح حدیبیہ اور خیبر میں شریک ہوئے اور بعد والے غزوات میں بھی حصہ لیا۔ نبی اکرم صلی اللہ علیہ وسلم کی وفات کے بعد کوفہ منتقل ہو گئے۔ 87ھ میں وفات پائی۔ کوفہ میں وفات پانے والے صحابہ کرام رضی اللہ عنہم میں سب سے آخر میں وفات پانے والے صحابی ہیں۔ ان کی بینائی جاتی رہی تھی۔

832۔ اردو حاشیہ:
سابقہ احادیث سے ثابت ہوا ہے کہ کم از کم قرات فاتحہ واجب ہے۔ لہٰذا جو کوئی ازحد عاجز ہو اور کسی بھی معقول سبب سے سورۃ فاتحہ قرآن مجید پڑھنے یا یاد رکھنے پر قادر نہ ہو تو اسے مذکورہ بالا ذکر سے اپنی نماز پوری کرنی چاہیے۔ اس قسم کے دیگر کلمات طیبات پڑھا کرے۔ شارح مصابیح نے اشارہ کیا ہے کہ اس سائل کا سوال یہ تھا کہ میں فوری طور پر کچھ یاد نہیں کر سکتا۔ جب کہ نماز فرض ہو چکی ہے تب نبی کریم صلی اللہ علیہ وسلم نے اسے یہ کلمات تعلیم فرمائے۔ [عون المعبود]
بہرحال بوڑھے کھوسٹ مردوں عورتوں اور کمزور عقل افراد کے لئے رخصت ہے کہ وہ اس قسم کے ذکر سے اپنی نماز پڑھ سکتے ہیں۔

جو فاتحہ اور قرآن پڑھنے سے عاجز ہو وہ کیا کرے؟
➊ حضرت رفاعہ بن رافع رضی اللہ عنہ سے مروی ہے کہ رسول اللہ صلی اللہ علیہ وسلم نے ایک آدمی کو نماز سکھائی تو فرمایا: ”اگر تمہیں قرآن (کا کچھ حصہ) یاد ہے تو پڑھو۔ «وإلا فاحمد الله وكبره وهلله ثم اركع» ورنہ «الحمد لله، الله اكبر» اور «لا إله إلا الله» (حسب توفیق) کہہ کر رکوع کر لو۔“
[صحيح: صحيح ترمذي: 247، المشكاة: 804، إرواء الغليل: 321/1، صحيح أبو داود: 803، كتاب الصلاة: باب صلاة من لا يقيم صلبه....، أبو داود: 858، نسائي: 193/2، ترمذي: 302، أحمد: 340/4، دارمي: 305/1، حاكم: 242/1، بيهقي: 102/2]
➋ حضرت عبد اللہ بن ابی اوفی رضی اللہ عنہ سے مروی ہے کہ ایک آدمی نے نبی صلی اللہ علیہ وسلم کے پاس آ کر کہا بلا شبہ مجھے قرآن سے کچھ بھی یاد نہیں ہے لٰہذا آپ صلی اللہ علیہ وسلم مجھے وہ چیز سکھا دیجیے جو مجھے کفایت کر جائے تو آپ صلی اللہ علیہ وسلم نے فرمایا کہو: «سبحان الله، الحمد الله، لا إله إلا الله، والله أكبر، ولا حول ولا قوة إلا بالله»
[حسن: صحيح أبو داود: 742، كتاب الصلاة: باب ما يجرى الأمى والأعجمي من القراءة، أبو داود: 832، نسائي: 143/2، أحمد: 353/4، حميدي: 717، عبد الرزاق: 2747، ابن خزيمة: 544، دار قطني: 314/1، شرح السنة: 224/2]
یاد رہے کہ اس واقعہ کو تمام اوقات (یعنی ہمیشہ) کے لیے جواز نہیں بنانا چاہیے کیونکہ جو شخص ان کلمات کو سیکھنے کی طاقت رکھتا ہے لا محالہ وہ فاتحہ سکھنے کی بھی طاقت رکھتا ہو گا چنانچہ اس کی تاویل یہ ہو گی کہ (اس شخص نے کہا) ”میں اس وقت کچھ بھی قرآن سیکھنے کی طاقت نہیں رکھتا اور بے شک مجھ پر نماز کا وقت آ چکا ہے۔“ پس جب وہ اس نماز سے فارغ ہو گا تو اس پر (اگلی نماز کے لیے فاتحہ) سیکھنا لازم ہو گا جیسا کہ شارح المصابیح نے بھی یہی بیان کیا ہے۔
[تفصيل كے ليے ملاحظه هو: نيل الأوطار: 49/2]