حدیث حاشیہ:
فوائد ومسائل:
1۔
ان احادیث سے ثابت ہوتا ہے کہ آپ صلی اللہ علیہ وسلم مختار مطلق نہیں تھے۔
بلکہ اللہ تعالیٰ کے حکم کے پابند اور مامور تھے اور کوئی کام اللہ تعالیٰ کی اجازت کے بغیر نہیں کرتے تھے۔
2۔
ابن سیرین،
ابراہیم نخعی رحمۃ اللہ علیہ اور امام شعبی رحمۃ اللہ علیہ مردوں اور عورتوں دونوں کے لیے زیارت قبور مکروہ سمجھتے تھے لیکن ان کے بعد کے ائمہ کے نزدیک مردوں کے لیے قبروں کی زیارت کرنا بالاتفاق جائزہے۔
عورتوں کے بارے میں اختلاف ہے اکثریت کے نزدیک اگر خلاف شرع امور کا ارتکاب نہ کرے بلکہ موت اور آخرت کی فکر کرنے کے باعث ہو تو جائز ہے۔
اور آپ صلی اللہ علیہ وسلم نے زیارت قبورکا جو مقصد بیان کیا ہے،
اس مقصد کے مرد اور عورت دونوں ہی محتاج ہیں۔
3۔
آپ صلی اللہ علیہ وسلم کو اپنی والدہ کی قبر پر جانے کی اجازت تو مل گئی،
لیکن استغفار کی اجازت نہیں ملی۔
علامہ شوکانی رحمۃ اللہ علیہ نے تو اس کی وجہ یہ بیان کی ہے کہ ملت اسلام کے سوا کسی اور دین پر مرنے والے کے لیے استغفار کی اجازت نہیں ہے۔
لیکن کچھ علماء کا خیال ہے استغفار تو اس کے لیے ہے جو غیر معصوم ہو یا گناہگار ہو،
اورآپ کی والدہ سے تو کوئی گناہ سرزد نہیں ہوا۔
اس پر سوال یہ ہے کہ اگر معصوم کے لیے استغفار کی ضرورت نہیں ہے تو پھر حضور اکرم صلی اللہ علیہ وسلم کو آخری سورۃ،
سورہ نصر میں استغفار کا حکم کیوں دیا گیا کیا اس سے یہ وہم نہیں پیدا ہو سکتا کہ شاید آپ صلی اللہ علیہ وسلم نے کوئی گناہ کیا ہو،
جب کہ اصل حقیقت ہے کہ استغفار رفع درجات کا بھی باعث ہے۔
برحال علامہ سیوطی نے جو آپ صلی اللہ علیہ وسلم کے والدین کے بارے میں تین نظریات پیش کیے ہیں۔
وہ محل نظر ہیں۔
لیکن جیسا کہ ہم پہلے کہہ چکے ہیں اس مسئلے کو عام مجالس میں موضوع سخن بنانا درست نہیں ہے۔