حدیث حاشیہ:
مفردات الحدیث:
ذات السلاسل:
یہ 7ھ کا واقعہ ہے اور اس میں مشرکوں نے اپنے آپ کو ایک دوسرے سے باندھ لیا تھا،
تاکہ میدان نہ چھوڑیں یا وہاں سلسل نامی چشمہ تھا یا وہاں ریت کے ٹیلے تہ در تہ تھے۔
فوائد ومسائل:
اس جنگ میں ابوبکر اور عمر رضی اللہ عنہما کی موجودگی کے باوجود حضرت عمرو بن عاص کو امیر مقرر کیا گیا،
اس لیے ان کے دل میں خیال گزرا کہ شاید آپ کو سب سے زیادہ پیار مجھ ہی سے ہے،
اس لیے یہ سوال کیا اور جب چند ناموں میں ان کا نام نہ آیا تو خاموش ہو گئے۔

اردو حاشہ:
وضاحت:
1؎:
پیچھے فاطمہ رضی اللہ عنہا کے مناقب میں گزرا ہے کہ عورتوں میں فاطمہ اورمردوں میں ان کے شوہرعلی اللہ کے رسول صلی اللہ علیہ وسلم کو زیادہ محبوب تھے،
لیکن وہ حدیث ضعیف منکر ہے،
اور یہ حدیث صحیح ہے،
اور دونوں عورتوں اور دونوں مردوں کے اللہ کے رسول صلی اللہ علیہ وسلم کے زیادہ محبوب ہونے میں تضاد ہی کیا ہے،
یہ سب سے زیادہ محبوب تھے۔

حدیث حاشیہ:
اس لڑائی میں تین سو مہاجرین اور انصار مع تیس گھوڑے آپ نے بھیجے تھے۔
عمرو بن عاص ؓ کو ان کا سردار بنایا تھا۔
جب عمرو ؓ دشمن کے ملک کے قریب پہنچے تو انہوں نے اور مزید فوج طلب کی۔
آپ ا نے ابو عبیدہ بن جراح ؓ کو سردار مقرر کر کے دوسو آدمی اور بھیجے۔
ان میں حضرت ابوبکر اور عمر ؓ بھی تھے۔
ابو عبیدہ ؓ جب عمرو ؓ سے ملے تو انہوں نے امام بننا چاہا لیکن عمرو بن عاص ؓ نے کہا آنحضرت انے آپ کو میری مدد کے لیے بھیجا ہے، سردار تو میں ہی رہوں گا۔
ابو عبیدہ نے اس معقول بات کو مان لیا اور عمر وبن عاص ؓ امامت کرتے رہے۔
حاکم کی روایت میں ہے کہ عمرو بن عاص ؓ نے لشکر میں انگار روشن کر نے سے منع کیا، حضرت عمر ؓ نے اس پر انکا ر فرمایا تو حضرت ابو بکر صدیق ؓ نے کہا چپ رہو، آنحضرت صلی اللہ علیہ وسلم نے جو عمرو کو سردار مقرر کیا ہے تو اس وجہ سے کہ وہ لڑائی کے فن سے خوب واقف کار ہے۔
بیہقی کی روایت میں ہے کہ عمروبن عاص ؓ جب لوٹ کر آئے تو اپنے دل میں یہ سمجھے کہ میں حضرت ابو بکر وحضرت عمر ؓ سے زیادہ درجہ رکھتا ہوں۔
اسی لیے انہوں نے آنحضرت صلی اللہ علیہ وسلم سے سوال کیا، جس کا روایت میں تذکرہ ہے۔
جس کو سن کر انہیں حقیقت حال کا علم ہوگیا۔
اس حدیث سے یہ بھی نکلا کہ مفضول کی امامت بھی افضل کے لیے جا ئز ہے کیونکہ حضرات شیخین اور ابو عبیدہ ؓ حضرت عمرو ؓ سے افضل تھے۔

حدیث حاشیہ:
1۔
ایک روایت کے آخر میں ہے حضرت عمرو بن عاص ؓ کہتے ہیں اس کے بعد میں خاموش ہو گیا کہیں ایسا نہ ہو کہ مجھے سب سے آخر میں ذکر کریں۔
(صحیح البخاري، المغازی، حدیث: 4358)
2۔
غزوہ ذات السلاسل 7ہجری میں ہوا۔
اس غزوے میں کفار نے اپنے آپ کو زنجیروں سے باندھ رکھا تھا تاکہ وہ اجتماعی طور پر فرارنہ اختیار کر سکیں۔
مسلمانوں کے لشکر کی کمان حضرت عمرو بن عاص ؓ کر رہے تھے۔
ان میں حضرت ابو بکر ؓ اور حضرت عمر ؓ بھی موجود تھے۔
اس بنا پر حضرت عمرو بن عاص ؓ کے دل میں خیال پیدا ہوا کہ شاید وہ ان سب سے افضل ہیں اس لیے انھیں امیر بنایا گیا ہے۔
اسی لیے انھوں نے مذکورہ سوالات کیے۔
3۔
اس حدیث سے معلوم ہوا کہ ابو بکر ؓ رسول اللہ صلی اللہ علیہ وسلم کو بہت محبوب تھے نیز یہ بھی معلوم ہوا کہ جس دستے میں افضل لوگ موجود ہوں۔
ان پر کسی مصلحت کے پیش نظر مفضول کو امیر بنایا جا سکتا ہے۔

حدیث حاشیہ:
1۔
غزوہ ذات سلاسل کے لیے نبی کریم صلی اللہ علیہ وسلم نے تین سو مہاجرین وانصار کا دستہ روانہ فرمایا۔
ان کے امیر حضرت عمرو بن عاص ؓ تھے، پھر ان کی امداد کے لیے حضرت ابوعبیدہ بن جراح ؓ کی سرکردگی میں دوسومجاہدین مزید روانہ کیے۔
اس جنگ میں حضرت عمرو بن عاص ؓ نے مجاہدین کو آگ جلانے سے منع کردیا۔
حضرت عمر ؓ نے اس پر اعتراض کیا توحضرت ابوبکر ؓ نے فرمایا کہ انھیں اپنے حال پر چھوڑدوکیونکہ رسول اللہ صلی اللہ علیہ وسلم نے انھیں ہمارا امیر بنایا ہے کیونکہ وہ جنگی فنون میں ماہر ہے۔
پھر حضرت عمر ؓ خاموش ہوگئے۔
جب دشمن کو شکست ہوئی تومجاہدین نے ان کا پیچھا کرنا چاہا لیکن حضرت عمرو بن عاص ؓ نے اس سے بھی روک دیا۔
جب فتح یاب ہوکر رسول اللہ صلی اللہ علیہ وسلم کی خدمت میں حاضر ہوئے تو لوگوں نے رسول اللہ صلی اللہ علیہ وسلم سے ان باتوں کا ذکر کیا۔
رسول اللہ صلی اللہ علیہ وسلم نے حضرت عمرو بن عاص ؓ سے اس کی وجہ پوچھی تو انھوں نے عرض کی کہ میں نے انھیں آگ روشن کرنے سے اس لیے منع کیا تھاکہ دشمن کو ہماری فوج کی کمی کا علم نہ ہوسکے۔
اوردشمن کا پیچھا کرنے سے اس بنا پر روکاتھا کہ آگے دشمن کے مددگار موجود تھے۔
رسول اللہ صلی اللہ علیہ وسلم نے اس امر پر عمروبن عاص ؓ کی تحسین فرمائی۔
2۔
حضرت عمرو بن عاص ؓ کے دل میں خیال آیا کہ رسول اللہ صلی اللہ علیہ وسلم نے مجھے ایسے لشکر کا امیر بنایا ہے جس میں حضرت ابوبکر ؓ اورحضرت عمر ؓ جیسے جلیل القدر صحابی موجود ہیں، لہذاآپ کے نزدیک میرا مقام بہت بلند ہے، اس لیے رسول اللہ صلی اللہ علیہ وسلم کی خدمت میں حاضر ہوکر سوال کیا کہ آپ کوتمام لوگوں میں سے کون زیادہ پیارا ہے؟ 3۔
اس حدیث سے معلوم ہوا کہ مفضول کو فاضل پر امیربنانا جائز ہے جبکہ مفضول میں کوئی ایسا وصف ہو جس کے باعث وہ دوسروں سے ممتاز ہو۔
(فتح الباري: 94/8)
4۔
اس جنگ میں حضرت عمرو بن عاص ؓ کو احتلام ہوگیا۔
چونکہ سخت سردی تھی، اس لیے انھوں نے تیمم کرکے نماز پڑھائی اور دلیل کے طورپریہ آیت تلاوت فرمائی:
”اپنے آپ کو قتل نہ کرو۔
“ (النساء: 29/4)
جب رسول اللہ صلی اللہ علیہ وسلم کے پاس ان کا ذکر ہوا تو آپ نے انھیں کچھ نہ کہا۔
امام بخاری ؒ نے تعلیقاً اس واقعے کا تذکرہ کیا ہے۔
(صحیح البخاري، التیمم، باب: 7)