صالح بن خوات اس شخص سے روایت کرتے ہیں جس نے رسول اللہ صلی اللہ علیہ وسلم کے ساتھ غزوہ ذات الرقاع میں نماز خوف پڑھی تھی، اس نے بیان کیا کہ ”ایک گروہ نے آپ صلی اللہ علیہ وسلم کے ساتھ صف بنائی اور دوسرا گروہ دشمن کے سامنے رہا۔ پھر آپ صلی اللہ علیہ وسلم نے اس گروہ کو جو آپ کے ساتھ تھا ایک رکعت پڑھائی، پھر کھڑے رہے اور انہوں نے اپنی دوسری رکعت مکمل کی۔ پھر یہ لوگ دشمن کے سامنے چلے گئے اور دوسرا گروہ آ گیا۔ آپ صلی اللہ علیہ وسلم نے ان کو اپنی باقی ماندہ دوسری رکعت پڑھائی، پھر آپ بیٹھے رہے اور ان لوگوں نے اپنے طور پر اپنی نماز مکمل کی۔ پھر آپ نے ان کے ساتھ سلام پھیرا۔“ امام مالک رحمہ اللہ کہتے ہیں کہ ”(نماز خوف کے سلسلے میں) جو میں نے سنا ہے (ان میں سے یہی) حدیث یزید بن رومان مجھے زیادہ پسند ہے۔“ [سنن ابي داود/كتاب صلاة السفر/حدیث: 1238]