حبیب مالکی کا بیان ہے کہ ایک شخص نے (صحابی رسول) سیدنا عمران بن حصین رضی اللہ عنہ سے کہا: ”اے ابونجید! آپ لوگ ہمیں کچھ ایسی احادیث بیان کرتے ہیں جن کی اصل ہمیں قرآن میں نہیں ملتی۔“ اس پر سیدنا عمران بن حصین رضی اللہ عنہ غصے میں آ گئے اور اس سے کہا: ”کیا تمہیں قرآن میں یہ ملتا ہے کہ ہر چالیس درہم میں ایک درہم (زکوٰۃ) ہے؟ اور ہر اتنی اتنی تعداد بکریوں میں ایک بکری ہے؟ اور اتنے اتنے اونٹوں میں یہ کچھ (زکوٰۃ) ہے؟ کیا تم لوگوں کو یہ سب قرآن میں ملتا ہے؟“ اس نے کہا: ”نہیں۔“ سیدنا عمران بن حصین رضی اللہ عنہ کہنے لگے: ”تو تم نے یہ (مسائل و احکام) کس سے لیے ہیں؟ بلاشبہ تم یہ ہم (صحابہ) ہی سے لیتے ہو اور ہم نے انہیں اللہ کے رسول صلی اللہ علیہ وسلم سے لیا ہے۔“ (سیدنا عمران بن حصین رضی اللہ عنہ نے) اس طرح کی اور بھی کئی چیزیں ذکر کیں۔ [سنن ابي داود/كتاب الزكاة /حدیث: 1561]