عکرمہ رحمہ اللہ بیان کرتے ہیں کہ صحابہ کرام رضی اللہ عنہم کو ایک بار رمضان کے چاند میں شک ہو گیا۔ پس انہوں نے ارادہ کیا کہ نہ قیام کریں اور نہ روزہ رکھیں۔ تو حرہ کی طرف سے ایک اعرابی آیا، اس نے گواہی دی کہ اس نے چاند دیکھا ہے۔ اسے نبی کریم صلی اللہ علیہ وسلم کی خدمت میں پیش کیا گیا، آپ صلی اللہ علیہ وسلم نے فرمایا: ”کیا تو «لَا إِلٰهَ إِلَّا اللهُ مُحَمَّدٌ رَسُولُ اللهِ» ”اللہ کے سوا کوئی معبودِ برحق نہیں، محمد صلی اللہ علیہ وسلم اللہ کے رسول ہیں“ کی گواہی دیتا ہے؟“ اس نے کہا: ”ہاں“ اور شہادت دی کہ اس نے چاند دیکھا ہے۔ تب آپ صلی اللہ علیہ وسلم نے بلال رضی اللہ عنہ کو حکم دیا کہ لوگوں میں اعلان کر دو کہ ”رات کو قیام کریں اور (صبح کو) روزہ رکھیں۔“ امام ابوداؤد رحمہ اللہ فرماتے ہیں کہ ”اس حدیث کو ایک جماعت نے بواسطہ سماک، عکرمہ رحمہ اللہ سے مرسل روایت کیا ہے اور قیام کا ذکر حماد بن سلمہ رحمہ اللہ کے علاوہ کسی نے نہیں کیا۔“ [سنن ابي داود/كتاب الصيام /حدیث: 2341]