سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے وضو کیا اور اچھا وضو کیا اور ثواب کی نیت سے اپنے مسلمان بھائی کی عیادت کے لیے گیا تو اسے جہنم سے ستر سال کی مسافت پر دور کر دیا جائے گا۔“ ثابت بنانی رحمہ اللہ کہتے ہیں، میں نے پوچھا: ”اے ابوحمزہ! «خَرِيفٍ» سے کیا مراد ہے؟“ انہوں نے کہا: ”سال۔“ امام ابوداؤد رحمہ اللہ فرماتے ہیں: ”اہل بصرہ جن احادیث کے بیان کرنے میں منفرد ہیں ان میں سے ایک یہ بھی ہے کہ انسان باوضو ہو کر عیادت کے لیے جائے۔“ [سنن ابي داود/كتاب الجنائز /حدیث: 3097]