سیدنا سمرہ بن جندب رضی اللہ عنہ سے روایت ہے کہ ان کے ایک انصاری کے باغ میں کھجوروں کے چند درخت تھے اور اس انصاری کے ساتھ اس کے گھر والے بھی رہائش پذیر تھے۔ سیدنا سمرہ رضی اللہ عنہ اپنے درختوں کے لیے جاتے تو اس (انصاری) کو بڑی اذیت ہوتی اور اسے اس کا اس طرح آنا جانا برا لگتا تھا۔ انصاری نے سیدنا سمرہ رضی اللہ عنہ سے چاہا کہ یہ درخت اس کو بیچ دے، مگر سیدنا سمرہ رضی اللہ عنہ نے انکار کیا۔ پھر مطالبہ کیا کہ ان کے بدلے میں دوسرے درخت لے لے، تو بھی سیدنا سمرہ رضی اللہ عنہ نے انکار کیا۔ پھر وہ نبی کریم صلی اللہ علیہ وسلم کے پاس آیا اور یہ واقعہ بتایا۔ نبی کریم صلی اللہ علیہ وسلم نے بھی اس سے فرمایا: ”انہیں اس کو فروخت کر دے۔“ تو اس نے انکار کیا۔ پھر آپ صلی اللہ علیہ وسلم نے فرمایا: ”ان کے بدلے میں دوسرے درخت لے لے۔“ تو بھی اس نے انکار کر دیا۔ آپ صلی اللہ علیہ وسلم نے فرمایا: ”یہ اس کو ہبہ کر دے تجھے اتنا اتنا اجر ملے گا۔“ آپ صلی اللہ علیہ وسلم نے اس کو بہت ترغیب دی مگر اس نے انکار کر دیا۔ تب آپ صلی اللہ علیہ وسلم نے فرمایا: ”تو نقصان دینے والا ہے۔“ اور پھر رسول اللہ صلی اللہ علیہ وسلم نے انصاری سے فرمایا: ”جاؤ اور اس کی کھجوروں کو اکھاڑ ڈالو۔“ [سنن ابي داود/كتاب الأقضية /حدیث: 3636]