جناب عاصم بن حمید کہتے ہیں کہ میں نے سیدہ عائشہ رضی اللہ عنہا سے سوال کیا کہ رسول اللہ صلی اللہ علیہ وسلم اپنا قیام اللیل (تہجد) کس چیز سے شروع فرمایا کرتے تھے؟ انہوں نے کہا: ”تم نے مجھ سے وہ بات پوچھی ہے جو تم سے پہلے کسی نے نہیں پوچھی۔“ آپ صلی اللہ علیہ وسلم جب (نماز کے لیے) کھڑے ہوتے تو کہتے «اللهُ أَكْبَرُ» دس بار، «الْحَمْدُ لِلَّهِ» دس بار، پھر «سُبْحَانَ اللَّهِ» دس بار، «لَا إِلَهَ إِلَّا اللَّهُ» دس بار، «أَسْتَغْفِرُ اللَّهَ» دس بار اور (یہ دعا) پڑھتے «اللَّهُمَّ اغْفِرْ لِي، وَاهْدِنِي، وَارْزُقْنِي، وَعَافِنِي» ”اے اللہ! مجھے بخش دے، مجھے ہدایت دے، مجھے رزق عنایت فرما اور مجھے آرام و راحت سے بہرہ ور فرما۔“ اور آپ صلی اللہ علیہ وسلم قیامت کے روز (میدان حشر میں) کھڑے ہونے کی تنگی سے پناہ مانگتے تھے۔ امام ابوداؤد رحمہ اللہ نے فرمایا: ”اس حدیث کو خالد بن معدان نے سیدہ عائشہ رضی اللہ عنہا سے بواسطہ ربیعہ جرشی، مذکورہ بالا حدیث کی مانند روایت کیا ہے۔“ [سنن ابي داود/أبواب تفريع استفتاح الصلاة /حدیث: 766]