فوائد:
➊ یہ احادیث دلیل ہیں کہ وضو میں پاؤں دھونا فرض ہے (فقط پاؤں کا مسح نا کافی ہے) اور جمہور علماء کا بھی یہی موقف ہے۔
◈ امام نووی رحمہ اللہ کہتے ہیں کہ اس مسئلہ کے بارے میں علماء کے کئی مذاہب ہیں؛ تمام فقہائے کرام اور مفتیان عظام کا موقف ہے کہ وضو میں دونوں پاؤں ٹخنوں سمیت دھونا واجب ہے اور ان کا مسح نا کافی ہے، اور نہ ہی دھونے سمیت پاؤں کا مسح واجب ہے اور اس مجمع علیہ مسئلہ میں کسی کا خاص اختلاف بھی ثابت نہیں ہے۔
◈ حافظ ابن حجر رحمہ اللہ ** [فتح الباري] ** میں رقمطراز ہیں کہ علی، ابن عباس اور انس رضی اللہ عنہم کے سوا کسی صحابی کا اس مسئلہ میں اختلاف نہیں، پھر ان صحابہ نے بھی اپنے موقف سے رجوع کر لیا تھا۔
◈ عبد الرحمن بن ابی لیلیٰ کا قول ہے کہ تمام صحابہ کرام رضی اللہ عنہم کا اس مسئلہ پر اجماع ہے کہ وضو میں دونوں پاؤں کو دھونا واجب ہے۔ [نیل الأوطار: 184/1]
➋ وضو میں پاؤں کا کوئی حصہ خشک نہیں رہنا چاہیے، بلکہ پاؤں کے وہ حصے جہاں پانی پہنچانا مشکل ہو اور ان کے خشک رہنے کا خدشہ ہو انہیں خاص توجہ سے دھونا چاہیے کیونکہ پاؤں کا معمولی حصہ خشک رہنے سے وضو نہیں ہوتا۔