فوائد:
سیدنا عبد اللہ بن عمر رضی اللہ عنہ کی اس حدیث سے معلوم ہوتا ہے کہ نبی کریم صلی اللہ علیہ وسلم نماز شروع کرتے، رکوع جاتے اور رکوع سے سر اٹھاتے وقت رفع الیدین کیا کرتے تھے۔
اور اسی طرح نبی صلی اللہ علیہ وسلم دو رکعات پڑھ کر اٹھتے وقت بھی رفع الیدین کیا کرتے تھے۔
جیسا کہ صحیح بخاری [رقم: 736] میں سیدنا ابن عمر رضی اللہ عنہ سے مروی ہے اور نبی کریم صلی اللہ علیہ وسلم سے اس مبارک عمل کا ترک و نسخ ثابت نہیں ہے۔
یہی وجہ ہے کہ امام بخاری رحمہ اللہ الباری صحیح بخاری میں دو صحابہ کرام رضی اللہ عنہم کی احادیث لائے ہیں؛ ایک سیدنا ابن عمر رضی اللہ عنہ جو اوائلِ مدینہ سے آخر عمر تک آپ صلی اللہ علیہ وسلم کے ساتھ رہے اور دوسرے صحابی سیدنا مالک بن حویرث رضی اللہ عنہ جو نبی کریم صلی اللہ علیہ وسلم کی آخر عمر میں مسلمان ہوئے۔
اور یہ دونوں صحابی نبی صلی اللہ علیہ وسلم کی اس سنت مبارکہ کے ناقل ہیں۔
جس سے معلوم ہوتا ہے کہ نبی صلی اللہ علیہ وسلم نے یہ عمل مبارک ساری زندگی کیا۔
اسی طرح عبد اللہ بن عمر رضی اللہ عنہ خود ساری زندگی عاملِ رفع الیدین رہے، جیسا کہ صحیح بخاری میں ان کے مولیٰ نافع، جو کہ 83ھ میں مسلمان ہوئے [تاریخ اسلام للذہبي: 12/3] ان سے بیان کرتے ہیں۔
اسی طرح اس عمل کا دوام نبی کریم صلی اللہ علیہ وسلم کی دیگر احادیثِ صحیحہ سے بھی ثابت ہے جیسا کہ [السنن الکبرى للبيهقي: 72/2] سے ہے۔
یہ سیدنا صدیق اکبر رضی اللہ عنہ سے اور [شرح ابن عباس: 21421] میں سیدنا عمر رضی اللہ عنہ اور سیدنا ابو موسیٰ اشعری رضی اللہ عنہ سے [سنن دارقطنی: 292/1] میں مروی ہے۔