حضرت عبد اللہ بن ابو الھذیل رحمہ اللہ سے مروی ہے کہ حضرت موسیٰ علیہ السلام یا کسی اور نبی نے اللہ تعالیٰ سے دریافت کیا اے اللہ! یہ معاملہ آپ کی طرف سے کیسا عجیب ہوتا ہے؟ آپ کے دوست (نیک لوگ) دنیا میں خوفزدہ رہتے ہیں ان کو قتل کیا جاتا ہے، ان کو پکڑا جاتا ہے پھر ان کے ٹکڑے کیے جاتے ہیں اور آپ کے دشمن جو چاہتے ہیں کھاتے ہیں اور جو چاہتے ہیں پیتے ہیں (یا اسی طرح کی کوئی بات کہی) اللہ تعالیٰ نے ارشاد فرمایا: میرے بندے کو جنت کی سیر کر واؤ، اس نے وہاں وہ نعمتیں دیکھیں جو اس سے پہلے نہ دیکھی تھیں، رکھے ہوئے پیالے، سیدھے رکھے ہوئے تکیے اور بچھے ہوئے قالین، اور حورعین اور مختلف پھل اور خدام جیسے کہ وہ چھپے ہوئے موتی ہوں ان سب کی سیر کروائی گئی اللہ تعالیٰ نے ارشاد فرمایا: جب میرے دوستوں کا ٹھکانا یہ ہو تو دنیا میں جو بھی تکالیف انہیں پہنچے ان کو نقصان ہے؟ پھر ارشاد فرمایا: میرے بندے کو جہنم کی سیر کر واؤ، چناچہ اسے جہنم لے جایا گیا، اس میں سے آگ کی ایک گردن نکلی، جس کو دیکھ کر وہ بندہ بےہوش ہوگیا، پھر اسے کچھ افاقہ ہوا تو اللہ تعالیٰ نے فرمایا: جب میرے دشمنوں کا ٹھکانہ یہ ہو تو پھر دنیا میں ان کو جو بھی نعمتیں ملیں ان کو فائدہ ہے؟ اس نے عرض کیا کچھ بھی نہیں۔ [مصنف ابن ابي شيبه/كتاب الجنة/حدیث: 36716]