حضرت عدی بن حاتم فرماتے ہیں کہ میں اپنی قوم کے کچھ لوگوں کے ساتھ حضرت عمر بن خطاب کی خدمت میں حاضر ہوا۔ وہ قبیلہ طی کے کچھ لوگوں کے لئے دو ہزار کا وظیفہ مقرر کرنے میں مشغول تھے اور مجھ سے اعراض فرما رہے تھے۔ میں نے ان سے کہا کہ اے امیر المومنین! کیا آپ مجھے جانتے نہیں ہیں۔ یہ بات سن کر حضرت عمر ہنسے اور ہنستے ہنستے لیٹنے لگے۔ پھر فرمایا کہ خدا کی قسم! میں تمہیں اچھی طرح جانتا ہوں، جب سب لوگوں نے کفر کیا تو تم ایمان لائے، جب سب نے رخ پھیرا تو تم اسلام کی طرف متوجہ ہوئے۔ پھر عذر پیش کرتے ہوئے فرمایا کہ میں نے صرف ان لوگوں کے لئے وظیفہ مقرر کیا ہے جنہیں فاقے نے بدحال کر دیا ہے۔ وہ اپنے خاندانوں کے معزز لوگ ہیں اور یہ ان پر آنے والے حقوق کی وجہ سے ہے۔ [مصنف ابن ابي شيبه/كتاب الأوائل/حدیث: 38641]